Qozog‘iston prezidenti Qosim-Jo‘mart To‘qayev Amerikaning The Hill siyosiy nashri uchun maqola yozib, unda dunyo yetakchilariga murojaat qildi. Bu haqda Qozog‘iston telegraf agentligi xabar berdi.
“BMT tashkil etilganidan buyon 78 yil davomida Bosh assambleya har yili zamonaviy xalqaro muammolarni hal qilish uchun jahon siyosatining eng nufuzli yetakchilarini o‘z tomi ostida birlashtiradi. Har yili bu uchrashuv milliardlab insonlar taqdirini o‘zgartiruvchi qarorlar uchun bir necha kishining cheksiz mas’uliyatini eslatib o‘tadi, garchi bir qarashda ularning qabul qilinishi ahamiyatsiz bo‘lib ko‘rinsa ham”, — deydi To‘qayev.
Siyosatchi 2023-yil mas’uliyat yuki odatdagidan ham og‘ir ekanini ta’kidladi. U xalqaro tartib nafaqat qutblangan, balki bo‘linishning iloji yo‘q bir paytda parchalanganini aytdi.
“Kelgusi oylar va hattoki yillarda dunyo yetakchilarining ko‘p sonli masalalar bo‘yicha qarorlari — xoh iqlim o‘zgarishi yoki sun’iy intellekt bo‘lsin, kelgusi o‘nlab yillar, hatto asrlar davomida aks-sado beradi. Butun dunyodagi hamkasblarim e’tibordan chetda qoldirib bo‘lmaydigan inqirozlar va muammolarning taktik yechimlarini topish bilan band”, — deb yozadi u.
Qozog‘iston prezidenti, shuningdek, jahon yetakchilariga yuzlanib, kelajak uchun mas’uliyatni unutmaslikka chaqirdi.
“Siyosiy karyeramiz va bizga ajratilgan vaqtdan tashqarida kelajak uchun mas’uliyatni hech qachon unutmasligimiz kerak. So‘nggi yillar tajribasi biz yaxshi bilgan, ammo ahamiyat bermagan tahdidlarga to‘liq tayyor emasligimizni tasdiqladi. Bu tahdidlar bizning davrimizda sodir bo‘lishi ehtimoldan yiroq deb ishongandik. Bu boradagi eng yorqin misol pandemiyadir”, — dedi To‘qayev.
Siyosatchi oddiy virus shtammiga dunyoning hech bir davlat tayyot bo‘lmagani, bu boradagi ikkinchi misol iqlim o‘zgarishi ekanini bildirdi.
“Bu inqiroz o‘nlab yillar davomida insoniyatning uzoqni ko‘ra olmaslik kontekstida ko‘z o‘ngimizda asta-sekin va izchil rivojlanib bormoqda. Tabiatga jiddiy zarar yetkazilgan taqdirda, vaziyatni o‘zgartirishi mumkin bo‘lgan yechimlarga yaqinlashamiz. Endi muvaffaqiyatga erishamizmi yoki yo‘q vaqt ko‘rsatadi.
Biroq, yuqoridagi barcha tahdidlarning eng dahshatlisi yadroviy o‘zini-o‘zi yo‘q qilishdir — so‘nggi oylarda yadroviy kuchlar o‘rtasida kuchayib borayotgan keskinlik sharoitida tahdid realdir. Bunday keskinliklar dunyoning barcha mintaqalarida sezilmoqda,hatto sovuq urushning eng qora kunlarida ham kuzatilmagan darajaga yetdi”, — deb yozgan prezident.
U Qozog‘iston yadro quroli tarqalishining oqibatlarini boshidan kechirgani va uning oldini olish bo‘yicha global sa’y-harakatlarda yetakchi o‘rinni egallaganini aytdi. Biroq, To‘qayev bu harakatlar xalqaro miqyosda qo‘llab-quvvatlansagina natijalarni berishi va sezilarli bo‘lishini bildirdi.
“Bu butun dunyodagi yetakchilarning siyosiy qarashlari, jasorati va uzoqni ko‘ra olishini talab qiladi. Ayniqda, bu globallashuv va ommaviy axborot vositalari barcha yo‘nalishlarda qo‘shimcha siyosiy bosim va qutblanishni yuzaga keltirayotgan dunyoda oson ish emas.
Insoniyat tarixi uchun barqaror va muvaffaqiyatli yo‘lni belgilasak, kengroq fikr yuritishdan boshqa ilojimiz yo‘q. Sa’y-harakatlarimizni kelgusi bir necha oylar uchun emas, kelgusi asrlar davomida kelajakni shakllantiradigan qarorlarga qaratishimiz kerak”, — deya xulosa qildi Qozog‘iston rahbari
Izoh (0)