Қозоғистон президенти Қосим-Жўмарт Тўқаев Американинг Тhе Hill сиёсий нашри учун мақола ёзиб, унда дунё етакчиларига мурожаат қилди. Бу ҳақда Қозоғистон телеграф агентлиги хабар берди.
“БМТ ташкил этилганидан буён 78 йил давомида Бош ассамблея ҳар йили замонавий халқаро муаммоларни ҳал қилиш учун жаҳон сиёсатининг энг нуфузли етакчиларини ўз томи остида бирлаштиради. Ҳар йили бу учрашув миллиардлаб инсонлар тақдирини ўзгартирувчи қарорлар учун бир неча кишининг чексиз масъулиятини эслатиб ўтади, гарчи бир қарашда уларнинг қабул қилиниши аҳамиятсиз бўлиб кўринса ҳам”, — дейди Тўқаев.
Сиёсатчи 2023 йил масъулият юки одатдагидан ҳам оғир эканини таъкидлади. У халқаро тартиб нафақат қутбланган, балки бўлинишнинг иложи йўқ бир пайтда парчаланганини айтди.
“Келгуси ойлар ва ҳаттоки йилларда дунё етакчиларининг кўп сонли масалалар бўйича қарорлари — хоҳ иқлим ўзгариши ёки сунъий интеллект бўлсин, келгуси ўнлаб йиллар, ҳатто асрлар давомида акс-садо беради. Бутун дунёдаги ҳамкасбларим эътибордан четда қолдириб бўлмайдиган инқирозлар ва муаммоларнинг тактик ечимларини топиш билан банд”, — деб ёзади у.
Қозоғистон президенти, шунингдек, жаҳон етакчиларига юзланиб, келажак учун масъулиятни унутмасликка чақирди.
“Сиёсий карьерамиз ва бизга ажратилган вақтдан ташқарида келажак учун масъулиятни ҳеч қачон унутмаслигимиз керак. Сўнгги йиллар тажрибаси биз яхши билган, аммо аҳамият бермаган таҳдидларга тўлиқ тайёр эмаслигимизни тасдиқлади. Бу таҳдидлар бизнинг давримизда содир бўлиши эҳтимолдан йироқ деб ишонгандик. Бу борадаги энг ёрқин мисол пандемиядир”, — деди Тўқаев.
Сиёсатчи оддий вирус штаммига дунёнинг ҳеч бир давлат тайёт бўлмагани, бу борадаги иккинчи мисол иқлим ўзгариши эканини билдирди.
“Бу инқироз ўнлаб йиллар давомида инсониятнинг узоқни кўра олмаслик контекстида кўз ўнгимизда аста-секин ва изчил ривожланиб бормоқда. Табиатга жиддий зарар етказилган тақдирда, вазиятни ўзгартириши мумкин бўлган ечимларга яқинлашамиз. Энди муваффақиятга эришамизми ёки йўқ вақт кўрсатади.
Бироқ, юқоридаги барча таҳдидларнинг энг даҳшатлиси ядровий ўзини-ўзи йўқ қилишдир — сўнгги ойларда ядровий кучлар ўртасида кучайиб бораётган кескинлик шароитида таҳдид реалдир. Бундай кескинликлар дунёнинг барча минтақаларида сезилмоқда,ҳатто совуқ урушнинг энг қора кунларида ҳам кузатилмаган даражага етди”, — деб ёзган президент.
У Қозоғистон ядро қуроли тарқалишининг оқибатларини бошидан кечиргани ва унинг олдини олиш бўйича глобал саъй-ҳаракатларда етакчи ўринни эгаллаганини айтди. Бироқ, Тўқаев бу ҳаракатлар халқаро миқёсда қўллаб-қувватлансагина натижаларни бериши ва сезиларли бўлишини билдирди.
“Бу бутун дунёдаги етакчиларнинг сиёсий қарашлари, жасорати ва узоқни кўра олишини талаб қилади. Айниқда, бу глобаллашув ва оммавий ахборот воситалари барча йўналишларда қўшимча сиёсий босим ва қутбланишни юзага келтираётган дунёда осон иш эмас.
Инсоният тарихи учун барқарор ва муваффақиятли йўлни белгиласак, кенгроқ фикр юритишдан бошқа иложимиз йўқ. Саъй-ҳаракатларимизни келгуси бир неча ойлар учун эмас, келгуси асрлар давомида келажакни шакллантирадиган қарорларга қаратишимиз керак”, — дея хулоса қилди Қозоғистон раҳбари
Изоҳ (0)