Oliy Majlis Qonunchilik palatasining majlisida Jinoyat, Jinoyat-protsessual kodekslariga hamda Ma‘muriy javobgarlik to‘g‘risidagi kodeksiga o‘zgartirish va qo‘shimchalar kiritish haqidagi qonun loyihasi ko‘rib chiqildi. Bu haqda parlament quyi palatasi matbuot xizmati xabar berdi.
Qayd etilishicha, so‘nggi yillarda ayrim huquqbuzarlar tomonidan xorijdan olib kelinayotgan yoki bloklangan uyali aloqa qurilmalariga kam haq evaziga o‘zgalarning IMEI kodlarini ko‘chirib berish holatlari ko‘payib bormoqda. Bu esa fuqarolarning huquqlariga zarar yetkazib, mobil telefon o‘g‘irligi, shuningdek, mobil telefonlarni qo‘lga kiritish maqsadida bosqinchilik, talonchilik va boshqa og‘ir turdagi ayrim jinoyatlar sonining oshishiga hamda ularning aksariyati fosh etilmasdan qolishiga sabab bo‘lyapti.
Mazkur qonun loyihasi Qonunchilik palatasining shu yil 5-sentabr kuni bo‘lib o‘tgan majlisida deputatlar tomonidan qizg‘in muhokama qilinib, konseptual jihatdan qabul qilingan edi. Loyihani ikkinchi o‘qishga tayyorlash jarayonida mas’ul qo‘mita tomonidan tegishli vazirlik va idoralar bilan birgalikda seminarlar, davra suhbatlari o‘tkazilgan.
“Ularda deputatlar, ekspertlar, huquqshunoslar tomonidan berilgan barcha takliflar, fikr-mulohazalar chuqur tahlil qilinib, ularning aksariyati loyiha matnida aks ettirilgan holda qonun loyihasi maromiga yetkazildi”, — deyiladi xabarda.
Deputatlarning ta’kidlashicha, qonun loyihasining qabul qilinishi axborot-kommunikatsiya texnologiyalaridan foydalangan holda sodir etilayotgan yangi turdagi jinoyatlarning oldini olishga, javobgarlikning muqarrarligini va fuqarolar xavfsizligi ta‘minlanishiga xizmat qiladi. Majlisda qonun loyihasi deputatlar tomonidan qabul qilingan.
Eslatib o‘tamiz, O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi 2019-yil 1-apreldan joriy etilgan. 2020-yil 22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgan, unga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerakligi belgilangandi.
Izoh (0)