Ijtimoiy tarmoqlarda O‘zbekistonda avtokreditlar cheklanishi mumkinligi haqida xabarlar tarqaldi. Markaziy bank mazkur xabarlar bo‘yicha ma’lumot berdi.
Unga ko‘ra, Bank nazorati qo‘mitasi tomonidan Markaziy bankning nazoratga doir vazifalari ijrosini ta’minlash maqsadida 2023 yilning 12-sentabr kuni o‘tkazilgan yig‘ilishida banklarning kredit portfelida konsentratsiya tavakkalchiligi holati yuzasidan qarori qabul qilindi. Bunda banklar “Banklar va bank faoliyati to‘g‘risida”gi qonunga muvofiq, aktivlari bo‘yicha yo‘qotishlarga oid tavakkalchilikni kamaytirish maqsadida o‘z aktivlarining diversifikatsiya qilinishini ta’minlashi kerakligi belgilandi.
Shu bilan birga, qonunchilikka asosan Markaziy bank tomonidan banklar faoliyatiga ta’sir ko‘rsatuvchi tavakkalchiliklar aniqlanganda, ularning barqarorligini sezilarli darajada yomonlashtiruvchi tavakkalchiliklarga sabab bo‘ladigan ayrim moliyaviy operatsiyalarni amalga oshirishga belgilangan cheklovlarga rioya etish talablarini kuchaytirish ta’kidlandi.
So‘nggi yillarda banklar tomonidan jismoniy shaxslarga ajratilgan kreditlar tarkibida avtokreditlar ulushining keskin ortishi konsentratsiya tavakkalichigini vujudga keltirib, mazkur yo‘nalishda yuzaga kelishi mumkin bo‘lgan moliyaviy yo‘qotishlarning banklar barqarorligiga ta’siri xatarlarining oshishiga sabab bo‘lmoqda.
Shu munosabat bilan omonatchilar va kreditorlar manfaatlari himoya qilinishini hamda yuzaga kelishi mumkin bo‘lgan tavakkalchiliklarning banklar barqarorligiga salbiy ta’sirini kamaytirish maqsadida Markaziy bank bank nazorati qo‘mitasi qarori bilan tijorat banklariga kredit portfelining diversifikatsiya qilinishini ta’minlash yuzasidan tegishli ko‘rsatmalar berildi.
Qayd etilishicha, Markaziy bankning ushbu ko‘rsatmasi banklar tomonidan avtokreditlar ajratilishini taqiqlamaydi hamda taklif etilayotgan foiz stavkalari oshishiga ta’sir ko‘rsatmaydi. Bugungi kunda mamlakatda faoliyat yuritayotgan barcha banklarda avtokreditlar ajratish imkoniyatlari mavjud va amalga oshirilmoqda.
Izoh (0)