Eron Yevropa Ittifoqi tuzilmalarida ishlagan Shvetsiya fuqarosini hibsda saqlamoqda. Bu haqda Politico xabar berdi.
Ma’lum qilinishicha, qo‘lga olingan Shvetsiya fuqarosi Islom Respublikasi hududida jinoyat sodir etgan, uning ishi sudga o‘tkaziladi. Gap josuslikda ayblanib 500 kundan ortiq Eron qamoqxonasida qolayotgan shved Yoxan Floderus haqida ketmoqda.
Yevropa Ittifoqi va Shvetsiya diplomatik korpusda ishlagan Floderusning Eronda hibsga olinganini bir yildan ortiq vaqt davomida yashirib kelgan. Yevropa Ittifoqi diplomatiyasi rahbari Jozep Borrel Floderusni ozod qilishga harakat qilishayotganini aytdi.
Eron rasmiysi hibsga olingan shaxsning ismini oshkor qilmagan, biroq xorijlik Eron hududida “jinoyat sodir etishda” ayblanayotganini da’vo qilmoqda.
The New York Times gazetasining yozishicha, Floderus do‘stlari bilan Eronga sayyoh sifatida kelgan, biroq 2022-yil 17-aprelda Tehrondan jo‘nab ketishidan oldin hibsga olingan. O‘sha yilning iyul oyida Eron hukumati Shvetsiya fuqarosini josuslik uchun hibsga olganini e’lon qilgan.
Hozirda u Evin qamoqxonasida saqlanmoqda. Floderus avvalroq ham Eronga ish yuzasidan borgan, biroq hech qanday voqea sodir bo‘lmagan.
Eron Floderusni josuslikda ayblamoqda, ismi oshkor etilmagan olti kishi uning razvedka ishlariga aloqador emasligini aytgan.
Shvetsiya Tashqi ishlar vazirligi “2022-yil aprelida Eronda Shvetsiya fuqarosi” hibsga olinishi bilan bog‘liq ish ustida faol ish olib borayotganini tasdiqlagan, ammo oshkoralik muzokaralarni murakkablashtirishini qo‘shimcha qilgan.
Izoh (0)