Тошкент шаҳар Мактабгача ва мактаб таълими бошқармаси пойтахтдаги мактаблардан бирида пул йиғилаётгани айтилган хабарга муносабат билдирди.
Бошқарма Тошкент шаҳридаги барча давлат умумтаълим мактабларида дарслар тўлиқ бепул ўтилишини маълум қилди. Фақатгина ҳар бир таълим муассасасида бюджетдан ташқари маблағ топиш мақсадида ўқувчиларга дарсдан кейин Вазирлар Маҳкамасининг 2019 йил 22 апрелдаги 343-сонли қарорига биноан шартнома асосида пуллик қўшимча тўгараклар ҳамда машғулотлар ўтиш, куни узайтирилган гуруҳлар фаолиятлари йўлга қўйилган.
Таъкидланишича, Мирзо Улуғбек туманидаги 208-сонли умумтаълим мактабида ҳам айни пайтда юқоридаги қарор асосида бир қатор ишлар амалга оширилмоқда. Мактабда анъанавий дарслар бепул олиб борилади. Ота-оналарнинг истак-хоҳишларига кўра, таълим масканида мактаб билан тузилган ўзаро шартнома асосида қўшимча дарслар, тўгараклар, куни узайтирилган гуруҳлар ташкил этилган.
Қайд этилишича, мактаб педагоглар жамоаси анъанавий дарс соатларини юқори савияда олиб бориш учун бор тажриба ва маҳоратини ишга солишмоқда. Таълум муассасида ўқувчилар тўлиқ бепул дарсликлар билан таъминланган. Махсус компьютерлаштирилган хоналар, кутубхона, спорт заллари ва ошхона уларнинг ихтиёрида.
“Шундай экан, ижтимоий тармоқ саҳифаларидаги хабар муаллифидан мактаб ҳаёти ва педагоглар фаолиятига холис баҳо беришини сўраб қолардик”, — дейилади муносабатда.
Август охирларида Наманган вилояти Янгиқўрғон туманидаги мактабда “Ташаббусли бюджет” учун ўқитувчилардан 500 минг сўмдан пул йиғилгани аниқланган эди.
Изоҳ (0)