Ukraina hududiy mudofaa xalqaro legionida xizmat qilgan Britaniya fuqarosi Jordan Chadvik Ukrainada halok bo‘ldi, deb xabar bermoqda BBC rus xizmati.
Bernli shahridan bo‘lgan 31 yoshli Chadvikning jasadi qo‘llari orqasiga bog‘langan holda hovuzdan topilgan. Uning o‘lim joyi va voqeaning boshqa holatlari noma’lum. Qarindoshlari Chadvikning o‘limi haqida iyun oyining oxirida xabar topishgan. Ukraina rasmiylari uning o‘limi sabablarini o‘rganib chiqdi, shundan so‘ng jasadni qarindoshlariga jo‘natdi. Ukraina rasmiylari tergov natijalarini oshkor qilmadi.
Avgust oyida Buyuk Britaniyada jasad ikkinchi marta tekshiruvdan o‘tkazildi, uning natijalari noma’lum. Qirollik tergovi 2024-yil fevral oyida o‘tkazilishi kutilmoqda.
Chadvik 2011—2015-yillarda Britaniya armiyasida shotland gvardiyachisi sifatida xizmat qilgan. Chadvikning onasi BBC’ga 2022-yil oktabr oyi boshida u Ukrainaga jo‘nab ketganini va u yerda “Rossiya agressiyasiga qarshilik ko‘rsatish”da ishtirok etish uchun xalqaro legionga qo‘shilganini aytdi.
Yanvar oyida Soledar yaqinida Ukraina tomonidan jangovar harakatlarda qatnashgan ikki nafar Britaniya fuqarosi, 28 yoshli Kris Perri va 47 yoshli Endryu Begshou halok bo‘lgandi. Perri avvaliga Severodonetskdan aholini evakuatsiya qilishda ishtirok etgan, keyin Limanning sharqida ishlagan, Begshou esa gumanitar yordam yetkazishda qatnashgan.
Izoh (0)