Bugun O‘zbekistondagi mavjud umumta’lim maktablarida birinchi qo‘ng‘iroq sa’dolari yangrab, rasman 2023/2024-o‘quv yili boshlandi. Hududlarda bo‘lib o‘tgan birinchi qo‘ng‘iroq tadbirlarida viloyat hokimlari ham ko‘rinish berib, maktab o‘quvchilarini yangi o‘quv yili bilan qutladi. “Daryo” shu kun munosabati bilan viloyat hokimlarining o‘quvchilik yillarini yodga oldi va ular tahsil olgan maktablarni aniqlashtirdi.
Surxondaryo viloyati hokimi Ulug‘bek Qosimov Qashqadaryodagi maktabda tahsil olgan
Ulug‘bek Qosimovning matbuot kotibi Murodbek Davlatovga ko‘ra, Surxondaryo viloyati rahbari Qashqadaryo viloyatining Qamashi tumanidagi G‘ofur G‘ulom nomidagi 76-maktabda tahsil olgan. 1990-yil 1-sinfga borib, birinchi qo‘ng‘iroq tadbirida ishtirok etgan Ulug‘bek Qosimov 2001-yil shu maktabning 11-sinfini tamomlab, so‘nggi qo‘ng‘iroq jarangi ostida katta hayotga qadam qo‘ygan.
Toshkent viloyati hokimi Zoir Mirzayev Samarqanddagi maktabda o‘qigan
Toshkent viloyati hokimi Zoir Mirzayevning “Daryo”ga bildirishicha, u o‘zi tug‘ilib o‘sgan Samarqand viloyatining Jomboy tumanidagi umumta’lim maktabida ta’lim olgan.
1974-yil tumandagi 7-maktabning birinchi sinfiga borgan Zoir Mirzayev shu maktabning 10-sinfini 1985-yil tamomlagan.
Qashqadaryo hokimi o‘zi rahbarlik qilayotgan viloyatdagi maktabda ta’lim olgan
.jpg)
Ayni kunda Qashqadaryo viloyatiga rahbarlik qilib kelayotgan Murodjon Azimov viloyatning Kitob tumanidagi maktablarning birini tamomlagan.
Hokimlik axborot xizmati rahbari Ahror Sodiqovning ma’lumot berishicha, Murodjon Azimov Kitob tumanidagi Jayraxona qishlog‘ida joylashgan Abdulla Qodiriy nomidagi 49-sonli umumta’lim maktabida o‘qigan. Viloyat hokimi shu maktabning 11-sinfini 1993-yil tamomlagan.
Sirdaryo hokimi Farg‘onadagi maktabni tugatgan
Sirdaryo viloyati hokimi Akmaljon Mahmudaliyev Farg‘ona viloyatining Farg‘ona tumanidagi Avval qishlog‘ida joylashgan 38-umumta’lim maktabida ta’lim olgan.
Hokimning “Daryo”ga bildirishicha, u 1980-yil shu maktabning 1-sinfiga borib, 1991-yil maktabning 11-sinfini tugatgan.
Andijon hokimi Shuhrat Abdurahmonov Paxtaobodda tahsil olgan
Doimo shov-shuvlar girdobida yuruvchi Andijon viloyati hokimi Shuhrat Abdurahmonov ham aksariyat hokimlar kabi o‘zi rahbarlik qilayotgan viloyatning Paxtaobod tumanidagi maktabda ta’lim-tarbiya olgan.
“Daryo” muxbirining aniqlashtirishicha, viloyat hokimi 1976-yil Paxtaobod tumanidagi 31-umumta’lim maktabining birinchi sinfga qabul qilinib, 1986-yilda o‘sha maktabning 10-sinfini tamomlagan.
Namangan hokimining o‘quvchi sifatida birinchi qo‘ng‘iroq tadbirida ishtirok qilganiga 30 yil bo‘ldi
Namangan viloyati hokimi Shavkat Abdurazzaqovning maktabni tamomlaganiga bu yil roppa-rosa 30 yil to‘ldi. U 1983—1993-yillarda Namangan shahridagi 2-umumta’lim maktabida tahsil olgan.
Farg‘ona hokimi Namangandagi maktab bitiruvchisi hisoblanadi
“Daryo”ning Farg‘ona viloyatidagi muxbiri Azizjon Ermatovning ma’lumot berishicha, Farg‘ona viloyati hokimi Xayrullo Bozorov Namangan viloyatidagi maktab bitiruvchisi hisoblanadi. U viloyatning Chortoq tumanidagi 9-umumta’lim maktabida tahsil olgan.
Buxoro hokimi Botir Zaripov G‘ijduvondagi maktabda o‘qigan
Buxoro viloyati hokimligi axborot xizmati rahbari Olim Jo‘rayevning “Daryo”ga bildirishicha, viloyat hokimi Botir Zaripov 1976-yil viloyatning G‘ijduvon tumanidagi 49-maktabga qadam qo‘yib, shu maktabni tamomlagan.
Izoh (0)