O‘zbekistonning Italiyadagi elchisi Otabek Akbarov va BMTning Qishloq xo‘jaligini rivojlantirish xalqaro jamg‘armasining (IFAD) Yaqin Sharq, Shimoliy Afrika, Yevropa va Markaziy Osiyo bo‘yicha mintaqaviy direktori Dina Salex o‘rtasida uchrashuv bo‘lib o‘tdi. Bu haqda “Dunyo” agentligi xabar berdi.
Qayd etilishicha, muloqotda so‘nggi yillarda o‘zaro munosabatlarning jadal sur’atlarda rivojlanayotgani, 2023-yilning boshida jamg‘arma tomonidan O‘zbekiston uchun umumiy qiymati 600 million dollar bo‘lgan 5 yillik mamlakat strategiyasi qabul qilingani, shuningdek, jamg‘armaning Toshkentda vakolatxonasi ochilishi to‘g‘risidagi qarori muhim qadam bo‘lgani ta’kidlangan.
Uchrashuvda Dina Salex jamg‘arma tomonidan yangi tayinlangan O‘zbekiston bilan muloqot bo‘yicha direktori Laura Mattiolini tanishtirib, uning xalqaro tashkilotlardagi boy tajribasi bilan mamlakat qishloq xo‘jaligida amalga oshirilayotgan izchil islohotlarga munosib hissa qo‘shishiga ishonch bildirgan.
Laura Mattioli sentabr oyida o‘z lavozimiga kirishishi hamda jamg‘armaning O‘zbekistondagi investitsiya portfelini muvaffaqiyatli amalga oshirish va uni yanada kengaytirishga tayyorligi ma’lum qilindi.
Uchrashuvda mamlakatda meva-sabzavotchilik va chorvachilik tarmog‘ida amalga oshirilayotgan loyihalarning bugungi holati to‘g‘risida fikr almashilgan. Ushbu loyihalar dehqon va fermer xo‘jaliklarida mahsulot yetishtirishni ko‘paytirishga va ularning daromadini yanada oshirishga ko‘mak berayotgani ta’kidlangan.
BMT Qishloq xo‘jaligini rivojlantirish xalqaro jamg‘armasi 1977-yilda Rimda tashkil topgan bo‘lib, uning asosiy maqsadi rivojlanayotgan mamlakatlarda dehqon va oilaviy xo‘jaliklarni qo‘llab-quvvatlashdan iborat. Jamg‘armaga 178 ta davlat a’zo, uning dunyo bo‘ylab 40 dan ortiq vakolatxonalari mavjud. O‘zbekiston mazkur xalqaro moliya institutiga 2011-yilda a’zo bo‘lgan.
Avgust oxirlarida Devid Xofman AQSH Xalqaro taraqqiyot agentligining (USAID) O‘zbekistondagi missiyasining yangi rahbari etib tayinlangani to‘g‘risida xabar berilgandi.
Izoh (0)