Surxondaryo viloyatining Sariosiyo tumanidagi Vochax qishlog‘ida yashovchi aholi vakillari salkam bir asrdan beri “svet”siz yashab kelardi. Ayni kunlarda shuncha vaqtdan beri zulmatda yashagan aholiga elektr toki tortib berilmoqda. Bu haqda “Daryo”ga viloyat hokimligi axborot xizmati xabar berdi.
Maʼlum qilinishicha, ushbu qishloqqa elektr toki umuman yetib bormagan.
Qishloq tuman markazidan 70 kilometr uzoqlikda, tog‘lar yonbag‘rida joylashgan bo‘lib, u yerda 21 ta xonadonda 120 nafardan ortiq aholi istiqomat qiladi, — deydi hokimlik axborot xizmati rahbari Murodbek Davlatov.
Masʼulning aytishicha, muammo Oliy Majlis Senati aʼzosi, senator Abdug‘ani Sanginovning tashabbusi bilan hal etilmoqda.
Qishloqqa elektr toki olib kelish uchun 100 dona maxsus temir ustun, 18 kilometr havo tarmog‘ini tortishga mo‘ljallangan elektr kabellari, 160 kVa transformator punkti ajratildi. Hozirda tog‘li hududlarda ishlashga mo‘ljallangan maxsus texnikalar yordamida temir ustunlarni o‘rnatish, havo elektr tarmoqlarini tortish ishlari olib borilmoqda, — deydi u.
Sariosiyo tumani hokimligining 2020-yildagi maʼlumotida yozilishicha, Energetika vazirligi hamda “Hududiy elektr tarmoqlari” AJ qishloqning elektr tokisiz ekanini Vochax qishlog‘i tumandagi elektrlashtirilgan eng chekka qishloq Qarsh qishlog‘idan 12 km balandlikda joylashganligi, shu sababli elektr tarmog‘ini tortishning texnik imkoni yo‘qligi bilan izohlagan. Va qishloqni elektrlashtirish uchun muqobil elektr energiyasi o‘rnatish bo‘yicha viloyat hokimligiga taklif kiritgan.
Izoh (1)
1 asrdan oldin u yerlarda elektr bo'lganmikin