Сурхондарё вилоятининг Сариосиё туманидаги Вочах қишлоғида яшовчи аҳоли вакиллари салкам бир асрдан бери “свет”сиз яшаб келарди. Айни кунларда шунча вақтдан бери зулматда яшаган аҳолига электр токи тортиб берилмоқда. Бу ҳақда “Дарё”га вилоят ҳокимлиги ахборот хизмати хабар берди.
Маълум қилинишича, ушбу қишлоққа электр токи умуман етиб бормаган.
Қишлоқ туман марказидан 70 километр узоқликда, тоғлар ёнбағрида жойлашган бўлиб, у ерда 21 та хонадонда 120 нафардан ортиқ аҳоли истиқомат қилади, — дейди ҳокимлик ахборот хизмати раҳбари Муродбек Давлатов.
Масъулнинг айтишича, муаммо Олий Мажлис Сенати аъзоси, сенатор Абдуғани Сангиновнинг ташаббуси билан ҳал этилмоқда.
Қишлоққа электр токи олиб келиш учун 100 дона махсус темир устун, 18 километр ҳаво тармоғини тортишга мўлжалланган электр кабеллари, 160 кВа трансформатор пункти ажратилди. Ҳозирда тоғли ҳудудларда ишлашга мўлжалланган махсус техникалар ёрдамида темир устунларни ўрнатиш, ҳаво электр тармоқларини тортиш ишлари олиб борилмоқда, — дейди у.
Сариосиё тумани ҳокимлигининг 2020 йилдаги маълумотида ёзилишича, Энергетика вазирлиги ҳамда “Ҳудудий электр тармоқлари” АЖ қишлоқнинг электр токисиз эканини Вочах қишлоғи тумандаги электрлаштирилган энг чекка қишлоқ Қарш қишлоғидан 12 км баландликда жойлашганлиги, шу сабабли электр тармоғини тортишнинг техник имкони йўқлиги билан изоҳлаган. Ва қишлоқни электрлаштириш учун муқобил электр энергияси ўрнатиш бўйича вилоят ҳокимлигига таклиф киритган.
Изоҳ (1)
1 asrdan oldin u yerlarda elektr bo'lganmikin