“Ikki davlat o‘rtasida ming yillik rishtalar bor” — O‘zbekiston prezidentining Ozarbayjonga tashrifi tafsilotlari

O‘zbekiston prezidenti Shavkat Mirziyoyev boshchiligidagi delegatsiya Ilhom Aliyev taklifiga binoan, 22–23-avgust kunlari Ozarbayjonga tashrif buyurdi. Ikki davlat rahbarlari O‘zbekiston—Ozarbayjon strategik sheriklik munosabatlarini yanada chuqurlashtirish va ko‘p qirrali hamkorlikni rivojlantirish masalalarini muhokama qildi.

Tashqi ishlar vazirligi MDH mamlakatlari bilan hamkorlik departamenti boshlig‘i Rahmatilla Nurimbetov “Daryo” nashriga bergan intervyusida tashrifning muhim nuqtalari haqida gapirdi. 

“Davlat rahbarining Ozarbayjonga tashrifi tarixiy ahamiyatga ega bo‘ldi. Chunki birinchidan, prezidentimizning ushbu mamlakatga ilk davlat tashrifi, yaʼni, bu diplomatiyada eng oliy darajadagi tashrif hisoblanadi. Ikkinchidan, Ozarbayjon O‘zbekiston uchun qardosh yurt. Bizni nafaqat bugungi kun, balki ming yillik rishtalar bog‘lab turadi. Uchinchidan, bu tashrif ikki mamlakat o‘rtasidagi hamkorlikning yangi sahifasini boshlab berdi”, — dedi mutaxassis.

Rahmatilla Nurimbetovning qo‘shimcha qilishicha, O‘zbekiston–Ozarbayjon strategik sherikligi keng qamrovli ahamiyatga ega.

“Bu ham siyosiy, ham xalqaro hamkorlik, ham savdo-iqtisodiy, ham mintaqaviy-gumanitar hamkorlikni qamrab oladi. Tashrif davomida siyosiy sohada qo‘lga kiritilgan qator yutuqlar mavjud. Ikki davlat o‘rtasida davlatlararo oliy darajadagi kengashning tuzilgani shular jumlasidandir. Bunday kengash bir-biriga yaqinlikka, ishonchga ega bo‘lgan, o‘rtada hech qanday muammosi bo‘lmagan davlatlar o‘rtasida tuziladi. O‘zbekiston Ozarbayjon uchun, Ozarbayjon esa O‘zbekiston uchun shunday ishonchli davlatga aylandi. 

Agar xalqaro kun tartibidagi masalalar bo‘yicha ikki mamlakat pozitsiyalariga nazar solsak o‘zaro hamohanglikni ko‘rish mumkin. Hattoki oxirgi paytlarda O‘zbekiston va Ozarbayjon qo‘shilmaslik harakati doirasida ham o‘zaro yaqin hamkorlikni yo‘lga qo‘ydi”, — dedi u.

Vazirlik mutaxassisining taʼkidlashicha, tashrifning eng asosiy nuqtalaridan biri savdo-iqtisodiy masalalarga oid. 

“Ikki davlat o‘rtasidagi o‘zaro tovar ayriboshlash hajmi so‘ngi besh yil ichida olti barobarga oshgan. Bu juda muhim ko‘rsatgich. Prezidentlar Bokudagi oliy darajadagi muzokaralarda mavjud salohiyat bundan ham ancha yuqori ekani taʼkidlashdi va yaqin kelajakda o‘zaro tovar ayriboshlash hajmini 1 milliard dollarga chiqarishga kelishib olindi. O‘zbekiston va Ozarbayjon bozorlari bir-birini to‘ldiruvchi bozorlar. Bizning iqtisodiyotimiz bir-birini to‘ldiradi. Ayniqsa, qishloq xo‘jaligi mahsulotlarini qayta ishlash, oziq-ovqat, kimyo, neft-gaz kabi yo‘nalishlar juda istiqbolli hisoblanadi”, —dedi Rahmatilla Nurimbetov.