Sudandagi harbiy mojaro tufayli mamlakatning ayrim viloyatlarida oziq-ovqat tugab bormoqda. Birlashgan Millatlar Tashkiloti odamlarga ovqat yetkazishga yo‘l ochish uchun nizolashayotgan tomonlardan harbiy harakatlarni to‘xtatishni so‘radi.
Tashkilot mintaqada harbiy harakatlar qayta boshlanganidan “chuqur xavotirda” ekanini ta’kidladi.
“Biz Sudandagi mojaro tomonlarini janglarni to‘xtatishga va yordamga muhtoj tinch aholining hayotini saqlab qolish uchun ularga ko‘mak yetkazilishiga ruxsat berishga chaqiramiz”, — deyiladi BMT bayonotida.
Ularning qo‘shimcha qilishicha, harbiy mojaro qayta boshlanganidan beri yuzlab yaradorlar va halok bo‘lganlar bor.
Sudandagi qurolli mojaro
Dunyodagi eng qashshoq mamlakatlardan biri Sudanda aprel oyida qurolli mojaro boshlandi. Mojaro mamlakatning amaldagi prezidenti, muntazam armiyani nazorat qiluvchi general Abdul Fattoh al-Burxon va uning o‘rinbosari, “Tezkor harakat kuchlari” qo‘mondoni general Muhammad Hamdan Dagalo o‘rtasidagi munosabatlarning keskinlashishi natijasida yuzaga kelgan. Poytaxt Xartumda shiddatli to‘qnashuvlar yuz berdi, minglab aholi shaharni tark etdi, yuzlab odamlar halok bo‘ldi.
Izoh (0)