Kinorejissor Rustam Sa’diyev jamoasi bilan birga yangi filmni suratga olishni boshladi. Hozircha film haqida rasmiy ma’lumot berilmagan bo‘lsa-da, uning suratga olinishi bilan bog‘liq kichik videolavhalar ijtimoiy tarmoqlarda shov-shuvga aylanmoqda. Chunki Rustam Sa’diyev bu gal ham eng mahoratli va ko‘zga ko‘ringan aktyorlarni bir nuqtaga jamladi.
Filmning nomi ham ajoyib. Rejissor filmni nega bunday nomlagani va uni suratga olishdan maqsad nima ekanligi haqida aytib o‘tdi.
— Bu kreativ yondashuv asosida suratga olinayotgan komediyali melodrama janridagi film hisoblanadi. Bu film haqida ancha vaqt o‘ylab yurgandim, keyin O‘zbekistondagi kinoteatr rahbarlari katta ekran uchun kassabop film olishni taklif qilishdi. Bu zamonaviy, bugungi kun g‘oyalarini o‘zida jamlagan film bo‘ladi.
Film nomi ham katta ahamiyatga ega. Uni “Kallaxona love” deb nomlashimizning o‘ziga xos sabablari bor. Toshkentni yaxshi bilgan insonlar Eski shahar tomondagi insonlar qadriyatlarga qanchalik sodiq ekanligini yaxshi bilishadi. Bundan tashqari, u hududlarda ota meros sifatida qassoblik bilan shug‘ullanadigan insonlar ham ko‘p. Ularning ish joyi kallaxona hisoblanadi. O‘sha yerda yashaydigan yigit, Toshkentning boshqa hududidagi zamonaviy oilaning qiziga ko‘ngil qo‘yadi. Ikki oilaning dunyoqarashi bir-biridan tubdan farq qiladi. Ammo ularning munosabatida soflik va chin muhabbat bor. Xullas, dunyoqarash va an’analarning to‘qnashuvi kulgili voqealarga sabab bo‘ladi, — deydi rejissor Rustam Sa’diyev.
Hozirgi kunda kinosaroylar huvullab qolgani va tomoshabinlarning qadami u yerdan uzilgani haqidagi gap-so‘zlar tez-tez quloqqa chalinadi. Shunday vaziyatda kassabop film qilishga urinish o‘zini qanchalik oqlaydi? Bu savolga rejissor quyidagicha javob berdi.
— Men hamisha tavakkal qilishga odatlanganman. Tavakkal esa har doim ham o‘zini oqlamaydi. Yutish bilan birga yutqazgan paytlarim ham bo‘lgan. Moliyaviy jihatdan ham xuddi shunday bo‘lgan. Kinoning tomoshabini yo‘q emas, yaxshi mahsulot bersa u albatta, kinosaroylarga keladi. Shunday vaqtlar ham bo‘ldiki, umuman film suratga olganim yo‘q. Chunki “kinoprokat”lar bachkana filmlar bilan to‘lib ketdi.
Tomoshabinning me’dasiga teggandan keyin o‘zimiz kinoning “o‘limi”ga sabab bo‘ldik. Endi uni jonlantirishga katta mablag‘ va kuch sarflayapmiz. Qachondir kimdir tavakkal qilishi va vaziyatni o‘nglashga urinishi kerak. “Baron 2” filmi bir oy davomida kinosaroylardagi namoyishidan 3 milliard so‘mga yaqin mablag‘ to‘pladi. Yaxshi film qilsa, tomoshabin Hirotdan bo‘lsa-da, uni ko‘rish uchun keladi.
Bir paytlar qo‘shni Qozog‘iston va Qirg‘izistonda o‘zbek kinolariga talab yuqori edi. Ular bizning filmlarimizni namoyish etish uchun shartnoma qilardi. Hozir esa kinosaroylarida namoyish etilayotgan filmlarining 35 foizini milliy mahsulotlari tashkil etadi. Bilmadim, bu O‘zbekistonda bir foizni tashkil etsa kerak.
Oxirgi yillarda komediya va melodrama yo‘nalishida filmlar olmay qo‘ydik. Balki, tomoshabin ana shunday filmlarni kutayotgandir, — deydi rejissor Rustam Sa’diyev.
Mazkur kartinada Farhod Abdullayev, Sayyora Mirhodiyeva, Botir Muhammadxo‘jayev, Jamila G‘ofurova, Shahlo Alijonova, Rixsitilla Abdullayev, Rayhon Asadova, Bobur Mansurov kabi eng ko‘zga ko‘ringan aktyorlar suratga tushishmoqda. Rejissorning ma’lum qilishicha, film premyerasi oktabr oyida bo‘lib o‘tadi.
Izoh (0)