Кинорежиссёр Рустам Саъдиев жамоаси билан бирга янги фильмни суратга олишни бошлади. Ҳозирча фильм ҳақида расмий маълумот берилмаган бўлса-да, унинг суратга олиниши билан боғлиқ кичик видеолавҳалар ижтимоий тармоқларда шов-шувга айланмоқда. Чунки Рустам Саъдиев бу гал ҳам энг маҳоратли ва кўзга кўринган актёрларни бир нуқтага жамлади.
Фильмнинг номи ҳам ажойиб. Режиссёр фильмни нега бундай номлагани ва уни суратга олишдан мақсад нима эканлиги ҳақида айтиб ўтди.
— Бу креатив ёндашув асосида суратга олинаётган комедияли мелодрама жанридаги фильм ҳисобланади. Бу фильм ҳақида анча вақт ўйлаб юргандим, кейин Ўзбекистондаги кинотеатр раҳбарлари катта экран учун кассабоп фильм олишни таклиф қилишди. Бу замонавий, бугунги кун ғояларини ўзида жамлаган фильм бўлади.
Фильм номи ҳам катта аҳамиятга эга. Уни “Kallaxona love” деб номлашимизнинг ўзига хос сабаблари бор. Тошкентни яхши билган инсонлар Эски шаҳар томондаги инсонлар қадриятларга қанчалик содиқ эканлигини яхши билишади. Бундан ташқари, у ҳудудларда ота мерос сифатида қассоблик билан шуғулланадиган инсонлар ҳам кўп. Уларнинг иш жойи каллахона ҳисобланади. Ўша ерда яшайдиган йигит, Тошкентнинг бошқа ҳудудидаги замонавий оиланинг қизига кўнгил қўяди. Икки оиланинг дунёқараши бир-биридан тубдан фарқ қилади. Аммо уларнинг муносабатида софлик ва чин муҳаббат бор. Хуллас, дунёқараш ва анъаналарнинг тўқнашуви кулгили воқеаларга сабаб бўлади, — дейди режиссёр Рустам Саъдиев.
Ҳозирги кунда киносаройлар ҳувуллаб қолгани ва томошабинларнинг қадами у ердан узилгани ҳақидаги гап-сўзлар тез-тез қулоққа чалинади. Шундай вазиятда кассабоп фильм қилишга уриниш ўзини қанчалик оқлайди? Бу саволга режиссёр қуйидагича жавоб берди.
— Мен ҳамиша таваккал қилишга одатланганман. Таваккал эса ҳар доим ҳам ўзини оқламайди. Ютиш билан бирга ютқазган пайтларим ҳам бўлган. Молиявий жиҳатдан ҳам худди шундай бўлган. Кинонинг томошабини йўқ эмас, яхши маҳсулот берса у албатта, киносаройларга келади. Шундай вақтлар ҳам бўлдики, умуман фильм суратга олганим йўқ. Чунки “кинопрокат”лар бачкана фильмлар билан тўлиб кетди.
Томошабиннинг меъдасига теггандан кейин ўзимиз кинонинг “ўлими”га сабаб бўлдик. Энди уни жонлантиришга катта маблағ ва куч сарфлаяпмиз. Қачондир кимдир таваккал қилиши ва вазиятни ўнглашга уриниши керак. “Барон 2” фильми бир ой давомида киносаройлардаги намойишидан 3 миллиард сўмга яқин маблағ тўплади. Яхши фильм қилса, томошабин Ҳиротдан бўлса-да, уни кўриш учун келади.
Бир пайтлар қўшни Қозоғистон ва Қирғизистонда ўзбек киноларига талаб юқори эди. Улар бизнинг фильмларимизни намойиш этиш учун шартнома қиларди. Ҳозир эса киносаройларида намойиш этилаётган фильмларининг 35 фоизини миллий маҳсулотлари ташкил этади. Билмадим, бу Ўзбекистонда бир фоизни ташкил этса керак.
Охирги йилларда комедия ва мелодрама йўналишида фильмлар олмай қўйдик. Балки, томошабин ана шундай фильмларни кутаётгандир, — дейди режиссёр Рустам Саъдиев.
Мазкур картинада Фарҳод Абдуллаев, Сайёра Мирҳодиева, Ботир Муҳаммадхўжаев, Жамила Ғофурова, Шаҳло Алижонова, Рихситилла Абдуллаев, Райҳон Асадова, Бобур Мансуров каби энг кўзга кўринган актёрлар суратга тушишмоқда. Режиссёрнинг маълум қилишича, фильм премьераси октябрь ойида бўлиб ўтади.
Изоҳ (0)