Qozog‘iston sharqidagi Oltoy shahrida Leninning haykali restavratsiya payti qulab tushdi. Bu haqda xabar Nur.kz xabar berdi.
Ijtimoiy tarmoqlarda haykal qulagani aks etgan kadrlar paydo bo‘lgan. Haykal o‘rnatilgan maydonda 15-avgust kuni obodonlashtirish ishlari boshlangan. Lenin haykali poydevorining granit plitalarini rekonstruksiya qilish rejalashtirilgan.
Pudratchining so‘zlariga ko‘ra, ish vaqtida “yodgorlikning o‘zi” qulab tushgan. Oltoy viloyati hokimligida voqeaga quyidagicha izoh berilgan:
“Ijtimoiy tarmoqlarda ta’mirlash vaqtida haykalning siljishiga yo‘l qo‘yilgani, oqibatda u qulagani aks etgan video tarqalmoqda. Huquq-tartibot idoralari voqea sabablarini o‘rganmoqda”, — deyiladi xabarda.
Xabar qilinishicha, haykalning qo‘li singan, zarar unchalik katta emas. Pudratchi, o‘z navbatida, haykalni ta’mirlab, uni o‘z joyiga qaytarishini aytgan.
“Ushbu fakt bo‘yicha Qozog‘iston Jinoyat kodeksining 203-moddasi 1-qismi (alohida ahamiyatga ega bo‘lgan narsalarni qasddan yo‘q qilish, olib tashlash yoki buzish) bilan tergov harakatlari olib borilmoqda”, — deyiladi Qozog‘iston IIB matbuot xizmati xabarida.
Izoh (0)