Moskvada erkak Qizil maydondagi Lenin maqbarasiga o‘t qo‘yishga urindi, deb xabar bermoqda Baza va 112 nashrlari.
Maʼlumotlarga ko‘ra, erkak himoya panjarasi ichiga “Molotov kokteyli”ni (qo‘lbola portlovchi modda) uloqtirgan. Hujumchi politsiya tomonidan qo‘lga olingan.
Baza qayd etishicha, voqea 17-iyul kuni kechqurun sodir bo‘lgan. Chita shahridan kelgan 37 yoshli erkak politsiyaga qarshilik ko‘rsatgan, u noadekvat holatda bo‘lgan. Unga nisbatan “militsiya xodimining qonuniy talabiga bo‘ysunmaslik” moddasi bo‘yicha ma’muriy ish qo‘zg‘atilgan.
Ma’lumot uchun, Moskvadagi maqbarada saqlanayotgan Vladimir Leninning jasadini yerga dafn qilish masalasi ko‘p yillardan beri Rossiyada turli bahs-munozaralarga sabab bo‘lib keladi.
Vladimir Lenin 1924-yil 21-yanvarda Moskva yaqinida vafot etgan. Uning jasadi balzamlangan va Qizil maydonda maxsus qurilgan maqbaraga qo‘yilgan. 1991-yilda SSSR parchalanganidan keyin inqilobchining jasadini qayta ko‘mish masalasi turli darajalarda bir necha bor ko‘tarilgan. Ammo o‘z yakuniga yetmay qolgan.
Izoh (0)