Бухоро вилояти Қоракўл туманида ички ишлар ходимлари кўчага пакетга солиб ташлаб кетилган чақалоқ ҳаётини сақлаб қолгани ҳақида хабар берилган эди. Оила ва хотин-қизлар қўмитаси ҳолат юзасидан муносабат билдирди.
Унга кўра, ички ишлар органлари томонидан ушбу ҳолат ҳамда уни келтириб чиқарган сабаб ва омилларни аниқлаш юзасидан терговга қадар текширув ҳаракатлари олиб борилаётгани маълум қилинди. Қўмита масъуллари томонидан ҳам ушбу ҳаракатни содир этган фуқаронинг оиласидаги маънавий муҳит, ижтимоий ҳолат юзасидан маълумотлар таҳлил этилмоқда.
“Оила ва хотин-қизлар қўмитаси тизими ҳар қандай вазиятда ҳам онанинг фарзандини ўлимга олиб борадиган бу каби ҳолатда ташлаб кетишини кескин қоралайди.
Аввало, фарзанд билан боғлиқ мажбуриятларни эслатган ҳолда мабодо ота ёки она ўз фарзандидан воз кечишга қарор қилган тақдирда бунинг қонуний асослари борлигини, бола ҳаётига таҳдид солишлик қонун билан жазоланиши муқаррарлигини таъкидлашни ўринли деб билади. Гўдакларимизни парваришлайлик, фарзандларимизни асрайлик”, — дейилади хабарда.
8 август куни соат 01:30 ларда Қоракўл тумани марказида тунги хизматга жалб этилган вилоят патрул-пост хизмати батальони туманлараро бўлинмаси сафдор ходими ҳамда туман ИИБ ЖХХ HPБ профилактика инспектори ўзларига бириктириб берилган йўналиш ҳудудида хизмат олиб бораётганида туман марказий касалхонасининг гемодиализ бўлими рўпарасидаги бинонинг орқа томонидан чақалоқ йиғисини эшитган. Улар шу атрофни кўздан кечирганида девор ёнида яшил рангли пакет ичида ўғил бола жинсига мансуб, тахминан, 3-5 кунлик соғлом ҳолатдаги чақалоқ борлиги аниқланган.
Шу пайтнинг ўзида чақалоқ ички ишлар органлари ходимлари томонидан туман тиббиёт бирлашмаси болалар бўлимига ётқизилиб, зарурий биринчи тиббий ёрдам кўрсатилган ва соҳа мутахассислари назоратига олинган.
Мазкур ҳолат юзасидан туман ИИБ ходимлари томонидан олиб борилган кечиктириб бўлмас тезкор суриштирув ҳаракатлари давомида ушбу чақалоқ 2023 йилнинг 4 август куни яшаш хонадонида ҳеч қандай тиббиёт ходимларисиз соат 08:00 ларда дунёга келтирилган ва 7 август куни соат 21:00 атрофида онаси — 1995 йилда туғилган, Қоракўл тумани “Мироб” маҳалласида яшовчи Б.З. исмли аёл томонидан ташлаб кетилгани аниқланган.
Ҳозирги пайтда ҳолат ҳамда уни келтириб чиқарган сабаб ва омилларни аниқлаш юзасидан терговга қадар текширув ҳаракатлари олиб борилаётган бўлиб, якуни юзасидан қўшимча маълумот берилади.
Изоҳ (0)