Shavkat Mirziyoyev ishtirokida bo‘lib o‘tgan IIV kengaytirilgan hay’at yig‘ilishida Milliy gvardiya qo‘mondonining jamoat xavfsizligini taʼminlash bo‘yicha birinchi o‘rinbosari ishdan olindi, deb xabar bermoqda Prezident matbuot xizmati.
Qayd etilishicha, prezident jamoat joylarida tinchlikni taʼminlash masalalariga alohida to‘xtaldi. Milliy gvardiyaga qo‘shimcha vakolat berilib, park, xiyobon va bozorlarda jamoat tartibini saqlash ushbu tuzilma zimmasiga yuklandi.
Lekin bozorlarni “jinoyatdan xoli hudud”ga aylantirish borasida Milliy gvardiyaning faoliyati qoniqarli emasligi taʼkidlandi. Shu yilning o‘zida Milliy gvardiya masʼul bo‘lgan hududlardagi 236 ta jinoyatning 86 foizi aynan bozorda sodir etilgan.
Umuman, Milliy gvardiya javobgarligi ostidagi hududlarda jinoyatlarga qarshi kurashish bo‘yicha tizim yaratilmagani ko‘rsatilib, Milliy gvardiya qo‘mondonining jamoat xavfsizligini taʼminlash bo‘yicha birinchi o‘rinbosari Inomjon Ibragimov lavozimidan ozod etildi.
Zimmasiga yuklatilgan vazifalarni lozim darajada bajarmaganligi uchun Milliy gvardiyaning Jizzax va Surxondaryo viloyatlari boshliqlari hamda Navoiy shahar qo‘riqlash bo‘limi boshlig‘ini ishdan bo‘shatishga ko‘rsatma berildi.
Izoh (0)