Qirg‘izistonlik dizayner Aida Sulova Chingiz Aytmatovning “Jamila” qissasi asosida mashhur Barbi qo‘g‘irchog‘ining mahalliy variantini yasadi.
“Barbi-Jamila – mashhur qo‘g‘irchoqning qirg‘izcha versiyasi haqidagi eski fantaziyam. Qirg‘izistonlik mashhur ayollar, kitoblar va filmlar qahramoni ko‘p. Agar menda yetarli vaqt bo‘lsa, ular asosida qo‘g‘irchoq yasashni xohlayman”, — dedi Sulova.
Dizayner o‘yinchoqni internet-do‘konlarda sotib olingan boshqa qo‘g‘irchoqlarning singan qismlaridan yasagan. Buning uchun u o‘g‘lining eski kiyimlaridan ham foydalangan.
Shuningdek, Sulova qo‘g‘irchoq uchun milliy uslubdagi kostyum haqida uzoq vaqt o‘ylaganini aytdi. Buning uchun u Barbining hind va afrikacha versiyasi bilan ham tanishgan.
2023-yilda “Barbi” filmi chiqdi, u iyul oyida eng mashhur yangi relizlardan biriga aylandi. Film gender tengsizligi muammolariga bag‘ishlangan va o‘ziga xos feministik manifestdir.
Barbi — dunyodagi eng mashhur qo‘g‘irchoq. U birinchi marta Mattel tomonidan 1959-yil 9-martda Nyu-Yorkdagi o‘yinchoqlar ko‘rgazmasida taqdim etilgan.
Izoh (0)