“Yong‘in sodir bo‘lganda qaysi raqamga qo‘ng‘iroq qilishni bilmaydiganlar ham bor” — Namangan FVB boshlig‘i

Namanganda joriy yil 6 oyi davomida 384 ta yong‘in sodir bo‘ldi. Bu haqda viloyat favqulodda vaziyatlar boshqarmasi boshlig‘i, general-mayor Qosimali Ahmedov maʼlum qildi, deya xabar beradi “Daryo” muxbiri Azizbek Abduvaliyev.

Yong‘in holatlari o‘tgan yilning shu davriga nisbatan 38 taga ko‘paygan. Hodisalarning 84,8 foizi, yaʼni 326 tasi aholi xonadonlarida sodir bo‘lgan. Ularning oqibatida 15 kishi turli darajada kuyish jarohatini olgan, o‘lim holatlari qayd etilmagan.

“Yong‘inlarning katta qismi, aniqroq aytadigan bo‘lsak, qariyb 50 foizi elektr energiyasi bilan bog‘liq bo‘lyapti. Simlar eskirgan, qisqa tutashuvlar ko‘p. Eng yomoni, ayrim fuqarolarimizda ham eʼtiborsizlik, beg‘amlik darajasi yuqori. Xonadonlarga kiramiz, qo‘shni devorining tagida olovni gurillatib o‘choqda ovqat tayyorlayotgan yoki tandirga o‘t qalayotgan bo‘ladi. Uyi falokatdan asrab qolingan ayollarimizdan biri hatto yong‘in sodir bo‘lganda qaysi raqamga qo‘ng‘iroq qilishni ham bilmas ekan”, — deydi Qosimali Ahmedov.

“Daryo” muxbirining Qo‘qon bozorida sodir bo‘lgan yong‘indan qanday xulosalar chiqarilgani haqidagi savoliga javoban FVB boshlig‘i mazkur hodisadan so‘ng Namangan shahridagi “Chorsu”, “Sardoba” va “Do‘stlik” kabi yirik bozorlarda o‘quv-taktik mashg‘ulotlar o‘tkazilgani va ularning natijalari chuqur tahlil etilganini qayd etib o‘tdi.

“Bozorlardagi noqonuniy qurilmalar oldirib tashlandi, maxsus xizmat mashinalarining erkin harakatlanishi, suv zaxiralari holati o‘rganildi. Uychi va Pop tumanlaridagi bozorlarda bu borada mavjud kamchiliklar aniqlanib, ularni bartaraf etish yuzasidan tegishli ko‘rsatmalar berildi”, — deya taʼkidladi general-mayor.