Наманганда жорий йил 6 ойи давомида 384 та ёнғин содир бўлди. Бу ҳақда вилоят фавқулодда вазиятлар бошқармаси бошлиғи, генерал майор Қосимали Аҳмедов маълум қилди, дея хабар беради “Дарё” мухбири Азизбек Абдувалиев.
Фото: Жаҳонгир Акрамов
Ёнғин ҳолатлари ўтган йилнинг шу даврига нисбатан 38 тага кўпайган. Ҳодисаларнинг 84,8 фоизи, яъни 326 таси аҳоли хонадонларида содир бўлган. Уларнинг оқибатида 15 киши турли даражада куйиш жароҳатини олган, ўлим ҳолатлари қайд этилмаган.
“Ёнғинларнинг катта қисми, аниқроқ айтадиган бўлсак, қарийб 50 фоизи электр энергияси билан боғлиқ бўляпти. Симлар эскирган, қисқа туташувлар кўп. Энг ёмони, айрим фуқароларимизда ҳам эътиборсизлик, беғамлик даражаси юқори. Хонадонларга кирамиз, қўшни деворининг тагида оловни гуриллатиб ўчоқда овқат тайёрлаётган ёки тандирга ўт қалаётган бўлади. Уйи фалокатдан асраб қолинган аёлларимиздан бири ҳатто ёнғин содир бўлганда қайси рақамга қўнғироқ қилишни ҳам билмас экан”, — дейди Қосимали Аҳмедов.
Наманган вилоят Фавқулодда вазиятлар бошқармаси бошлиғи, генерал майор Қосимали Аҳмедов
Фото: Жаҳонгир Акрамов
“Дарё” мухбирининг Қўқон бозорида содир бўлган ёнғиндан қандай хулосалар чиқарилгани ҳақидаги саволига жавобан ФВБ бошлиғи мазкур ҳодисадан сўнг Наманган шаҳридаги “Чорсу”, “Сардоба” ва “Дўстлик” каби йирик бозорларда ўқув-тактик машғулотлар ўтказилгани ва уларнинг натижалари чуқур таҳлил этилганини қайд этиб ўтди.
“Бозорлардаги ноқонуний қурилмалар олдириб ташланди, махсус хизмат машиналарининг эркин ҳаракатланиши, сув захиралари ҳолати ўрганилди. Уйчи ва Поп туманларидаги бозорларда бу борада мавжуд камчиликлар аниқланиб, уларни бартараф этиш юзасидан тегишли кўрсатмалар берилди”, — дея таъкидлади генерал майор.
Изоҳ (0)