“Million” jamoasi a’zosi Shahboz Narziyev “Daryo”ga intervyu berdi. U intervyu davomida bugungi kunda san’atdan butunlay yiroq sohada faoliyat yuritishi, tasodifan bu sohaga kelgani va unga “qimmat”ga tushgan sahna ko‘rinishi haqida so‘zlab berdi.
— Ko‘pchilik meni qashqadaryolik deb biladi, ammo asli Navoiyning Xatirchi tumanida dunyoga kelganman. Oilamizda san’atkorlar yo‘q, otam dehqonchilik bilan shug‘ullangan. Yetishtirgan mahsulotlarini bozorga olib chiqib sotardi. Negadir dadam bolaligimdan harbiy bo‘lishimni orzu qilardi. Men esa aktyorlikka qiziqardim. Ammo dadamning istaklariga qarshi borishni istamaganman. Chunki qanchalik qiynalib katta qilganini, o‘zi o‘qimagan bo‘lsa-da, bizni o‘qitishga jiddiy ahd qilganini yaxshi bilardim.
Kollejning ikkinchi kursida Rossiyaga ishlashga ketganman. Akam u yerda muxojir bo‘lib ishlardi, men ham bir yil davomida ko‘cha supuruvchi bo‘lib ishlaganman. Maxsus kiyimlarni kiyib, kun bo‘yi ko‘cha tozalardik, kechasi ko‘chada ko‘rgan odam bizni qora ishchi deb o‘ylamasdi. Topgan pulimiz chiroyli kiyinib, yeb-ichishimizga yetardi. Bir yil davomida ishlab topgan pulimga repetitorga qatnab, institutga o‘qishga kirganman, — deydi Shahboz Narziyev.
U tasodif sabab san’at sohasiga kirib kelgani haqida so‘zlab berdi.
— Irrigatsiya va melioratsiya institutining ikkinchi kursida o‘qib yurganimda tadbirda raqs tushgandim. Oradan biri necha kun o‘tib, dekan chaqirdi va QVZning “Targ‘ibot” jamoasida ishtirok etishimni buyurdi. Avvaliga rad etdim, ammo sessiyani “yopishim”ga ko‘maklashishlari haqida aytishganidan keyin rozi bo‘ldim. Chunki men ham ko‘pchilik o‘g‘il bolalar singari ko‘p dars qoldirardim. San’atga bo‘lgan qiziqishim qayta uyg‘ongandek bo‘ldi. QVZga shunchalik kirishib ketdimki, jamoani chempionlikkacha olib boraman deb ahd qildim. Ba’zi institut rahbarlari QVZga sovuqqonlik bilan qarashardi, ammo bizning rektor alohida mablag‘ ajratib, hamisha talabalarni qo‘llab-quvvatlardi. Hatto final bosqichida yutkazganimizda ham pul mukofoti berib, “Birinchi o‘rinni olgan jamoa bilan bir sahnada ishtirok etdinglar, bu ham katta yutuq”, degandi. Xullas, dekan majburlovi bilan rejalarim ham butunlay o‘zgarib ketgan. Avvaliga otam nima derkan, deb ikkilanganman. Ammo u san’atdagi yutuqlarimdan quvonayotganini ko‘rib, yanada olg‘a intilganman, — deydi Shahboz Narziyev.
Shahboz Narziyev jamoaga “qimmat”ga tushgan sahna ko‘rinishi haqida ham aytib o‘tdi.
— Yodingizda bo‘lsa, karantindagi to‘y sahnasi ko‘plab muhokamalarga sabab bo‘lgandi. Unda kuyov rolini ijro etgan hamkasbim O‘tkir Shodmonov bilan aktrisa Luiza Rasulovaga sahna ko‘rinishida nikoh o‘qigandim. Biz buni shunchaki sahna ko‘rinishi deb bilganmiz, xolos. O‘sha paytda O‘tkir Shodmonovning to‘yi bo‘lishi kerak edi. Din olimining gaplaridan keyin qiz tomon ham ancha ikkilanib qolgandi. Xullas mana shundan keyin tilga ehtiyot bo‘lish kerakligini va bir necha marta o‘ylab, keyin gapirish kerakligini bildim. Bu sahna ko‘rinishi “qimmat”ga tushdi, — deydi Shahboz Narziyev.
Izoh (0)