Rossiyalik bastakor, prodyuser Maksim Fadeyev xonanda Nargiz Zokirovaning 27-iyul kuni Toshkentda bo‘lib o‘tishi rejalashtirilgan konsertida mualliflik huquqi buzilishi ehtimoli bo‘yicha O‘zbekiston Madaniyat vazirligiga xat yo‘lladi. Bastakor Instagram’dagi sahifasiga xonandaning “o‘g‘ri” ekanini ta’kidlab, mualliflik huquqining buzilishiga yo‘l qo‘ysa, uni sudga berishini aytgan.
“Nargizning o‘tkazilishi rejalashtirilayotgan konsertining barcha tashkilotchilariga murojaat qilib shuni ma’lum qilmoqchimanki, bu xonanda birovning musiqasidan foydalanish o‘g‘rilik ekanligini tushunmaguncha, biz murojaat yo‘llashda davom etamiz.
Mening huquqlarimni buzgani haqidagi faktlarini yozib boramiz va har bir konsert o‘tkazilgan joyni sudga beramiz. Vaqtni ham, resurslarni ham ayamaymiz. U 27-iyul kuni Toshkentda konsert o‘tkazishni rejalashtiryapti, xatimiz zudlik bilan u yerga yuborildi”, — deydi bastakor.
2019-yilda xonanda va Fadeyev o‘rtasidagi shartnoma bekor qilingan va unga bastakor tomonidan yozilgan qo‘shiqlarni ijro etish taqiqlangan. Rossiyaga qarshi bayonotlaridan so‘ng, Fadeyev Nargiz Zokirovaga nima sababdan qo‘shiqlarini aynan shu tilda ijro etishda davom etayotgani haqida savol bergan. Nargiz Zokirovaning sobiq prodyuseri xonanda mualliflik huquqini buzgan holda pul topadigan, konsert o‘tkazadigan barcha joyni sudga bermoqchiligini aytgan.
Fadeyevning so‘zlariga ko‘ra, u bilan Nargizning o‘rtasidagi mojarolarga bastakorning xonandaga “sochi qirib tashlangan boshini yopish” uchun bosh kiyim kiyishni maslahat bergani bilan bog‘liq. Xonanda O‘zbekistonga qaytgach, dastlab o‘zini o‘zgartirishi haqida gapirgan bo‘lsa-da, bu ishni davom ettirmoqda. Prodyuser xonandaning “ishonchga kirgan oddiy o‘g‘ri” ekanligini aytib, u uzr so‘rash o‘rniga bir necha yillardan beri o‘z uyi bo‘lgan davlatga va ko‘p pul topadigan joyiga “tuhmat qilishda” davom etayotganini ham ta’kidlagan.
Avvalroq xonanda sobiq prodyuseri Maksim Fadeyev tomonidan yozilgan bir nechta qo‘shiqni O‘zbekistondagi tadbirlardan birida ijro etgani, bu esa muhokamalarga sabab bo‘lgani haqida xabar berilgan edi.
“Nargiz Zokirova O‘zbekistondagi tadbirlarda Maksim Fadeyevning qo‘shiqlarini kuylab, pul ishlashda davom etmoqda. Aslida bu qo‘shiqlar Nargizga mualliflik huquqlari to‘g‘risidagi qonun bo‘yicha taqiqlangan”, — deb yozadi rossiyalik jurnalist Alyona Jigalova.
Izoh (0)