“Миллион” жамоаси аъзоси Шаҳбоз Нарзиев “Дарё”га интервью берди. У интервью давомида бугунги кунда санъатдан бутунлай йироқ соҳада фаолият юритиши, тасодифан бу соҳага келгани ва унга “қиммат”га тушган саҳна кўриниши ҳақида сўзлаб берди.
— Кўпчилик мени қашқадарёлик деб билади, аммо асли Навоийнинг Хатирчи туманида дунёга келганман. Оиламизда санъаткорлар йўқ, отам деҳқончилик билан шуғулланган. Етиштирган маҳсулотларини бозорга олиб чиқиб сотарди. Негадир дадам болалигимдан ҳарбий бўлишимни орзу қиларди. Мен эса актёрликка қизиқардим. Аммо дадамнинг истакларига қарши боришни истамаганман. Чунки қанчалик қийналиб катта қилганини, ўзи ўқимаган бўлса-да, бизни ўқитишга жиддий аҳд қилганини яхши билардим.
Коллежнинг иккинчи курсида Россияга ишлашга кетганман. Акам у ерда мухожир бўлиб ишларди, мен ҳам бир йил давомида кўча супурувчи бўлиб ишлаганман. Махсус кийимларни кийиб, кун бўйи кўча тозалардик, кечаси кўчада кўрган одам бизни қора ишчи деб ўйламасди. Топган пулимиз чиройли кийиниб, еб-ичишимизга етарди. Бир йил давомида ишлаб топган пулимга репетиторга қатнаб, институтга ўқишга кирганман, — дейди Шаҳбоз Нарзиев.
У тасодиф сабаб санъат соҳасига кириб келгани ҳақида сўзлаб берди.
— Ирригация ва мелиорация институтининг иккинчи курсида ўқиб юрганимда тадбирда рақс тушгандим. Орадан бири неча кун ўтиб, декан чақирди ва ҚВЗнинг “Тарғибот” жамоасида иштирок этишимни буюрди. Аввалига рад этдим, аммо сессияни “ёпишим”га кўмаклашишлари ҳақида айтишганидан кейин рози бўлдим. Чунки мен ҳам кўпчилик ўғил болалар сингари кўп дарс қолдирардим. Санъатга бўлган қизиқишим қайта уйғонгандек бўлди. ҚВЗга шунчалик киришиб кетдимки, жамоани чемпионликкача олиб бораман деб аҳд қилдим. Баъзи институт раҳбарлари ҚВЗга совуққонлик билан қарашарди, аммо бизнинг ректор алоҳида маблағ ажратиб, ҳамиша талабаларни қўллаб-қувватларди. Ҳатто финал босқичида ютказганимизда ҳам пул мукофоти бериб, “Биринчи ўринни олган жамоа билан бир саҳнада иштирок этдинглар, бу ҳам катта ютуқ”, деганди. Хуллас, декан мажбурлови билан режаларим ҳам бутунлай ўзгариб кетган. Аввалига отам нима деркан, деб иккиланганман. Аммо у санъатдаги ютуқларимдан қувонаётганини кўриб, янада олға интилганман, — дейди Шаҳбоз Нарзиев.
Шаҳбоз Нарзиев жамоага “қиммат”га тушган саҳна кўриниши ҳақида ҳам айтиб ўтди.
— Ёдингизда бўлса, карантиндаги тўй саҳнаси кўплаб муҳокамаларга сабаб бўлганди. Унда куёв ролини ижро этган ҳамкасбим Ўткир Шодмонов билан актриса Луиза Расуловага саҳна кўринишида никоҳ ўқигандим. Биз буни шунчаки саҳна кўриниши деб билганмиз, холос. Ўша пайтда Ўткир Шодмоновнинг тўйи бўлиши керак эди. Дин олимининг гапларидан кейин қиз томон ҳам анча иккиланиб қолганди. Хуллас мана шундан кейин тилга эҳтиёт бўлиш кераклигини ва бир неча марта ўйлаб, кейин гапириш кераклигини билдим. Бу саҳна кўриниши “қиммат”га тушди, — дейди Шаҳбоз Нарзиев.
Изоҳ (0)