AQSH prezidenti Jo Bayden Turkiyaning F-16 qiruvchi samolyotlari haqidagi so‘rovini ma’qullashga tayyor. Bu haqda NATO sammiti boshlanishi arafasida prezidentning milliy xavfsizlik bo‘yicha maslahatchisi Jeyk Sallivan ma’lum qildi.
“Prezident F-16 qiruvchi samolyotlarini hech qanday shartlarsiz yetkazib berish masalasini ijobiy hal qilish niyatida”, — dedi Sallivan.
Turkiya F-16 ni sotib olish istagini 2021-yil oktabr oyida e’lon qilgan edi. Bu AQSHning beshinchi avlod F-35 qiruvchi samolyotlarini ishlab chiqarish dasturidan Turkiya chiqarib yuborilganidan keyin yuz berdi. Turklar Rossiyadan S-400 havo mudofaa tizimini sotib olgani tufayli AQSH shunday chora ko‘rishga qaror qildi.
Ma’lumki, AQSH prezidenti oxirgi marta 9-iyul kuni Turkiya prezidenti Rajab Toyyib Erdo‘g‘on bilan F-16 qiruvchi samolyotlarini yetkazib berish, shuningdek, Shvetsiya va Ukrainaning NATOga kirishi masalasini muhokama qilgandi.
Turkiya Shvetsiyaning ittifoqqa qo‘shilishiga rozilik bermagan yagona davlat bo‘lib turgandi. Ammo bugun Turkiya prezidenti Shvetsiyani NATOga qabul qilish to‘g‘risidagi protokolni mamlakat parlamentiga yuborishga rozi ekani ma’lum bo‘ldi.
NATO bosh kotibi Yens Stoltenbergning so‘zlariga ko‘ra, Erdo‘g‘on buni imkon qadar tezroq amalga oshirishga va’da bergan, Shvetsiya esa o‘z navbatida Turkiyaning Yevropa Ittifoqiga kirish jarayonini qayta tiklashga hissa qo‘shishga harakat qiladi.
Shu bilan birga, avvalroq Turkiya rahbari Shvetsiyaning NATOga a’zo bo‘lish haqidagi arizasini ma’qullash va F-16 qiruvchilarini Turkiyaga yetkazib berish masalasini o‘zaro bog‘lamaslikni so‘ragan edi.
Izoh (0)