Polsha Ichki xavfsizlik agentligi (IXA) “Rossiya razvedkasi uchun ishlagan” yana bir tarmoq a’zosini qo‘lga oldi. Bu haqda 10-iyul kuni Polsha ichki ishlar va ma’muriyat vaziri Mariush Kaminskiy ma’lum qildi.
Qo‘lga olingan shaxs Ukraina fuqarosi bo‘lib, u 2019-yildan beri Polshada yashaydi.
“Gumonlanuvchi harbiy inshootlar va dengiz portlarini kuzatgan”, — dedi vazir.
Uning so‘zlariga ko‘ra, erkak Rossiyadan doimiy pul olib turgan. Bu tergov doirasidagi ushlangan o‘n beshinchi odam, deb qo‘shimcha qildi Kaminskiy.
Avvalroq, 30-iyun kuni Polsha milliy prokuraturasi IXA xodimlari Rossiya fuqarosi va “birinchi liga klubi sportchisi”ni qo‘lga olgani haqida xabar bergan edi. OAV xabarlariga ko‘ra, gap xokkey klubi haqida boryapti.
Erkak uyushgan jinoiy guruhda ishtirok etish va Polsha zarariga xorijiy razvedka xizmati manfaatlarini ko‘zlab harakat qilganlik moddalari bo‘yicha ayblanmoqda.
Tergov ma’lumotlariga ko‘ra, u, xususan, bir nechta voyevodliklarda muhim infratuzilmani o‘rganish bilan shug‘ullangan, rahbarlarni razvedka natijalari to‘g‘risida xabardor qilgan va buning uchun mukofot olgan. Rossiyalik Polshada 2021-yil oktabr oyidan beri bo‘lgan. U hibsga olingan va 10 yilgacha qamoq jazosiga hukm qilinishi mumkin. 13-iyun kuni Lyublin tuman sudi erkakni uch oyga hibsga olishga qaror qildi.
Izoh (0)