Amerikaning Goldman Sachs investisiya banki prognozlariga ko‘ra, 2075-yilga borib Hindiston iqtisodiyoti nafaqat Yaponiya va Germaniyani, balki AQSHni ham ortda qoldirib, dunyoda ikkinchi o‘ringa chiqadi va o‘sish sur’ati Xitoyga yaqinlashadi.
Dunyoning ko‘plab yetakchi korporatsiyalari o‘z ishlab chiqarishlarini Xitoydan Hindistonga ko‘chirishni boshladilar, bu esa Hindiston sanoatini, jumladan, yuqori texnologiyalarni sezilarli darajada rag‘batlantiradi.
Amerikaning Goldman Sachs investisiya banki prognozlariga ko‘ra, aprel oyida aholi soni bo‘yicha Xitoyni ortda qoldirgan Hindiston 2075-yilga borib YIM bo‘yicha unga yetib oladi.
Goldman Sachs tahlilchisi Santanu Senguptaning fikricha, 52 yildan keyin iqtisodiyot hajmi quyidagicha ko‘rinishga keladi:
- Xitoy — 57 trillion dollar;
- Hindiston — 52,5 trillion dollar;
- AQSH — 51,5 trillion dollar;
- Yevrozona — 30,3 trillion dollar;
- Yaponiya — 7,5 trillion dollar.
Hindistonning iqtisodiy salohiyatini ro‘yobga chiqarishning asosiy omili sifatida mutaxassislar uning ustunligini ishchi kuchida, shuningdek, o‘z iste’dodlarini yetishtirishda ko‘rishmoqda.
“Keyingi 20 yil ichida Hindistonning qaramlik darajasi mintaqaviy iqtisodlar orasida eng past ko‘rsatkichlardan biri bo‘ladi,” — deb hisoblaydi janob Sengupta. “Hindiston ushbu imkoniyatdan ishlab chiqarish salohiyatini oshirish, xizmat ko‘rsatish sohasi va infratuzilmani rivojlantirish uchun foydalanishi mumkin”.
Hozir bu davlat iqtisodiyoti AQSH, Xitoy, Germaniya va Yaponiyadan keyin dunyoda beshinchi o‘rinda turadi.
Izoh (0)