Germaniya Ukrainaning NATOga a’zoligi haqidagi qarorni blokirovka qilmoqchi. Bild nashri tegishli ichki hukumat hujjati bilan tanishdi.
Mazkur ma’lumotni Germaniya hukumatidagi Bild manbalari ham tasdiqlagan.
Fransiya, Buyuk Britaniya, Polsha va Boltiqbo‘yi davlatlari Ukrainani imkon qadar tezroq harbiy ittifoqqa taklif qilish tarafdori, ammo Germaniyadan tashqari bu reja AQSH tomonidan ham qo‘llab-quvvatlanmaydi.
Berlin va Vashington 2008-yilda qabul qilingan “A’zolik bo‘yicha harakatlar rejasi”ni qo‘llab-quvvatlash uchun birlashdi: u Kiyevning NATOga qo‘shilishdan oldin amalga oshirishi kerak bo‘lgan ko‘plab qadamlarni o‘z ichiga oladi.
AQSHning pozitsiyasi esa yumshoqroq
Bild ma’lumotlariga ko‘ra, Amerika rahbariyati keyingi islohotlarni hisobga olgan holda Ukraina bo‘yicha uzoq muddatli “Harakat rejasi”dan voz kechishga rozi.
“Biz Ukrainaga Finlyandiya modelini, ya’ni urush tugashi bilan bir necha oy ichida alyansga qo‘shilishni taklif qilmoqchi edik”, — deydi amerikalik diplomatlardan biri.
Shu bilan birga, Olaf Shols hukumati “Ukraina NATOga kirishga deyarli tayyor” degan har qanday iboraning o‘rinsizligini ta’kidlamoqda.
Germaniya sammit oxirida yakuniy hujjatdagi taklif haqidagi eslatmaga ham, “Ukrainaning NATOdagi munosib o‘rni” haqidagi so‘zlarga ham rozi bo‘lishni niyat qilmayapti.
Ayni paytda Shimoliy Atlantika alyansida Berlin pozitsiyasidan norozilik kuchaymoqda.
“Sholsning xavfsizlik siyosatidagi o‘zgarishlar, ehtimol, Ukrainaga taalluqli emas”, — dedi diplomatlardan biri.
Bild xabariga ko‘ra, bugun (10-iyul) kechqurun Germaniya vakillari Vilnyusda NATO bo‘yicha boshqa hamkorlar bilan uchrashib, Ukrainaning a’zoligi masalasida yana bir bor murosa topishga harakat qiladi.
“Eng yomon holatda, seshanba kuni (11-iyul) hukumat rahbarlarining o‘zlari vaziyatga aralashishiga to‘g‘ri keladi”, — dedi Bild manbasi.
Izoh (0)