Oliy sud masʼuli 12 yil oldin vafot etgan fuqaro qamoqdaligiga ishora qilib, sud hukmidan norozi bo‘lsa, qamoqda shikoyat qilishi mumkinligini tushuntirdi

O‘zbekiston Respublikasi Oliy sudi masʼuli murojaatchiga javob xati yozib, 12 yil avval vafot etgan fuqaro qamoqdaligiga ishora qildi. Hamda u sud hukmidan norozi bo‘lsa, jazoni ijro etish kaloniyasi orqali shikoyat qilishi mumkinligini bildirdi. Bu haqda farg‘onalik jurnalist Sharifa Murod Facebook’dagi sahifasida maʼlum qildi.

“O‘zbekiston Respublikasi Oliy sudiga inson taqdiri o‘yinchoqmi? Nega odamning tirik-o‘likligini surishtirmay, pala-partish javob xati yozaveradi? Oliy sud raisi Baxtiyor Islomov, murojaatlar bilan ishlash boshqarmasi boshlig‘i S.Xodjamuratov nechanchi sinfni tugatgan? Oliy sud sudyasi D.Tojiboyev biror oliy o‘quv yurtida o‘qiganmi? Devonxona bo‘limi boshlig‘i U.Suyunovni qaysi burchakdan topib, olib kelib o‘tirg‘izib qo‘ygansizlar? Katta konsultantlar R.Mahkamov va I.Normatovlar faqat bog‘chaning bilimi bilan cheklanib qolgan xolosmi? Nega sudyalaringiz, boshqarma boshliqlaringiz, devonxona bo‘limi mudiri-yu, katta konsultantlaringiz bir inson taqdiriga, shikoyatlarga panja orasidan qaraydi?”, — deydi jurnalist voqea haqida yozar ekan.

Sharifa Murodning tushuntirishicha, ayni paytda qamoqda bo‘lgan Davron Sodiqovning bobosi Sodiqjon To‘xtaboyev Oliy sud raisi Baxtiyor Islomov nomiga ariza yozib, turmush o‘rtog‘i O‘lmasoy To‘xtaboyeva 2012-yili vafot etganini, o‘g‘li ham o‘lganini, to‘rt qizining hammasi nafaqadaligini bayon qilgan. Uyda boquvchisi yo‘qligini aytib, ijtimoiy himoyaga muhtojligini, hozirgi kunda qamoqda qolayotgan nabirasi yolg‘iz boquvchisi ekanini qo‘shimcha qilib, suddan Davron Sodiqovga yengillik berishini so‘ragan.

“Afsuski, ariza to‘liq o‘qib ham chiqilmagan. Sodiq buvaga yozilgan javob xatini o‘qib, yo qotib kulasiz, yo ho‘ngrab yig‘laysiz”, — deydi jurnalist.

Oliy sud masʼullari, xususan, murojaatlar bilan ishlash boshqarmasi boshlig‘i S. Xodjamuratov imzosi bilan fuqaroga yuborilgan javob xatida shunday deyiladi: “Turmush o‘rtog‘ingiz O‘.To‘xtaboyeva o‘ziga oid jinoyat ishi yuzasidan sud qarorlaridan norozi bo‘lsa, jinoyat-protsessual qonunchilikda belgilangan tartibda bevosita jazoni ijro etish kaloniyasi orqali O‘zbekiston Respublikasi Oliy sudi jinoyat ishlari bo‘yicha sudlov hayʼatiga muvofiq ravishda yozilgan takroriy kassatsiya tartibidagi shikoyat bilan murojaat qilish huquqiga ega ekanligi tushuntiriladi. Siz sud hukm va ajrimi (qarori) ustidan shikoyat berish huquqiga ega bo‘lmaganligingiz sababli murojaatingiz ko‘rmasdan qoldirildi”, — deyiladi masʼullar javobida.

Jurnalist Sharifa Murod Oliy sud masʼuli javobidagi O‘lmasoy To‘xtaboyeva 2012-yil vafot etib ketganini yozib, uning o‘lim guvohnomasini ham ilova qiladi.

“Murojaatlar bilan ishlash boshqarmasi boshlig‘i S. Xodjamuratov, O‘.To‘xtaboyeva go‘rida tinch yotibdi bu paytda. Mana o‘lim guvohnomasi ham bor. Oliy suddagilarning talqini bo‘yicha u jazoni ijro etish muassasasida emish”, — deydi u.

Oliy sud axborot xizmati jurnalistning mazkur chiqishiga javob qaytarib, anglashilmovchilik bo‘lganini bildirdi.

“Haqiqatan ham Farg‘ona viloyati Uchko‘prik tumani “Mirzaxo‘ja” MFY, Yuksalish ko‘chasida istiqomat qiluvchi S.To‘xtaboyevga 2023-yil 14-iyun kuni yuborilgan javob xatida qo‘pol xatolik o‘tkazib yuborilgan. Mazkur anglashilmovchilik uchun uzr so‘ragan holda unga yo‘l qo‘ygan xodimga nisbatan intizomiy jazo chorasi qo‘llanilganligi maʼlum qilinadi”, — deydi Oliy sud axborot xizmati masʼuli.