Олий суд масъули 12 йил олдин вафот этган фуқаро қамоқдалигига ишора қилиб, суд ҳукмидан норози бўлса, қамоқда шикоят қилиши мумкинлигини тушунтирди

Ўзбекистон Республикаси Олий суди масъули мурожаатчига жавоб хати ёзиб, 12 йил аввал вафот этган фуқаро қамоқдалигига ишора қилди. Ҳамда у суд ҳукмидан норози бўлса, жазони ижро этиш калонияси орқали шикоят қилиши мумкинлигини билдирди. Бу ҳақда фарғоналик журналист Шарифа Мурод Facebook’даги саҳифасида маълум қилди.

“Ўзбекистон Республикаси Олий судига инсон тақдири ўйинчоқми? Нега одамнинг тирик-ўликлигини суриштирмай, пала-партиш жавоб хати ёзаверади? Олий суд раиси Бахтиёр Исломов, мурожаатлар билан ишлаш бошқармаси бошлиғи С.Ходжамуратов нечанчи синфни тугатган? Олий суд судьяси Д.Тожибоев бирор олий ўқув юртида ўқиганми? Девонхона бўлими бошлиғи У.Суюновни қайси бурчакдан топиб, олиб келиб ўтирғизиб қўйгансизлар? Катта консултантлар Р.Маҳкамов ва И.Норматовлар фақат боғчанинг билими билан чекланиб қолган холосми? Нега судьяларингиз, бошқарма бошлиқларингиз, девонхона бўлими мудирию, катта консултантларингиз бир инсон тақдирига, шикоятларга панжа орасидан қарайди?”, — дейди журналист воқеа ҳақида ёзар экан.

Шарифа Муроднинг тушунтиришича, айни пайтда қамоқда бўлган Даврон Содиқовнинг бобоси Содиқжон Тўхтабоев Олий суд раиси Бахтиёр Исломов номига ариза ёзиб, турмуш ўртоғи Ўлмасой Тўхтабоева 2012 йили вафот этганини, ўғли ҳам ўлганини, тўрт қизининг ҳаммаси нафақадалигини баён қилган. Уйда боқувчиси йўқлигини айтиб, ижтимоий ҳимояга муҳтожлигини, ҳозирги кунда қамоқда қолаётган набираси ёлғиз боқувчиси эканини қўшимча қилиб, суддан Даврон Содиқовга енгиллик беришини сўраган.

“Афсуски, ариза тўлиқ ўқиб ҳам чиқилмаган. Содиқ бувага ёзилган жавоб хатини ўқиб, ё қотиб куласиз, ё ҳўнграб йиғлайсиз”, — дейди журналист.

Олий суд масъуллари, хусусан, мурожаатлар билан ишлаш бошқармаси бошлиғи С. Ходжамуратов имзоси билан фуқарога юборилган жавоб хатида шундай дейилади: “Турмуш ўртоғингиз Ў.Тўхтабоева ўзига оид жиноят иши юзасидан суд қарорларидан норози бўлса, жиноят-процессуал қонунчиликда белгиланган тартибда бевосита жазони ижро этиш калонияси орқали Ўзбекистон Республикаси Олий суди жиноят ишлари бўйича судлов ҳайъатига мувофиқ равишда ёзилган такрорий кассация тартибидаги шикоят билан мурожаат қилиш ҳуқуқига эга эканлиги тушунтирилади. Сиз суд ҳукм ва ажрими (қарори) устидан шикоят бериш ҳуқуқига эга бўлмаганлигингиз сабабли мурожаатингиз кўрмасдан қолдирилди”, — дейилади масъуллар жавобида.

Журналист Шарифа Мурод Олий суд масъули жавобидаги Ўлмасой Тўхтабоева 2012 йил вафот этиб кетганини ёзиб, унинг ўлим гувоҳномасини ҳам илова қилади.

“Мурожаатлар билан ишлаш бошқармаси бошлиғи С. Ходжамуратов, Ў.Тўхтабоева гўрида тинч ётибди бу пайтда. Мана ўлим гувоҳномаси ҳам бор. Олий суддагиларнинг талқини бўйича у жазони ижро этиш муассасасида эмиш”, — дейди у.

Олий суд ахборот хизмати журналистнинг мазкур чиқишига жавоб қайтариб, англашилмовчилик бўлганини билдирди.

“Ҳақиқатан ҳам Фарғона вилояти Учкўприк тумани “Мирзахўжа” МФЙ, Юксалиш кўчасида истиқомат қилувчи С.Тўхтабоевга 2023 йил 14 июнь куни юборилган жавоб хатида қўпол хатолик ўтказиб юборилган. Мазкур англашилмовчилик учун узр сўраган ҳолда унга йўл қўйган ходимга нисбатан интизомий жазо чораси қўлланилганлиги маълум қилинади”, — дейди Олий суд ахборот хизмати масъули.