Joriy yilning 30-iyun kuni eski namunadagi haydovchilik guvohnomalarini yangisiga almashtirishning ikkinchi bosqichi yakunlandi. Davlat yo‘l harakati xavfsizligi xizmati “prava”ni yangisiga almashtirishga ulgurmagan fuqaro jarimaga tortilmasligi va undan imtihon olinmasligini maʼlum qildi.
Foto: “Daryo”
O‘zbekistonda joriy yilning 1-iyulidan boshlab 2012-yilgacha berilgan eski namunadagi haydovchilik guvohnomalari haqiqiy emas deb hisoblanadi. Agarda fuqaro 30-iyun kuniga qadar “prava”sinini almashtirishga ulgurmagan bo‘lsa, unga 1-iyul kunidan keyin ham hech qanday jarima to‘lovlarisiz va imtihonlarsiz almashtirish imkon beriladi.
“Muddati o‘tgan yoki belgilangan muddatlarda almashtirilmagan haydovchilik guvohnomasi bilan avtomobil boshqargan taqdiringizda sizga nisbatan “Maʼmuriy javobgarlik to‘g‘risida”gi kodeksning 135-moddasi bilan “hujjatsiz boshqarish” bo‘yicha maʼmuriy bayonnoma rasmiylashtiriladi”, — deyiladi xizmat xabarida.
Eslatib o‘tamiz, hukumatning 2017-yil 2-martdagi haydovchilik guvohnomasi va “texpasport”ning yangi namunalarini joriy etishga doir qarorida hujjatlarni majburiy almashtirish muddatlari ko‘rsatilgan.
Qarorda belgilanishicha, 2017-yil 1-oktabr — 2018-yil 31-dekabr davrida eski namunadagi milliy haydovchilik guvohnomalari ularning berilgan sanasidan qatʼi nazar, egasining yozma arizasiga ko‘ra ixtiyoriy ravishda yangi namunadagi guvohnomalarga almashtirilishi kerak.
2019-yil 1-yanvardan eski namunadagi barcha milliy haydovchilik guvohnomalari va avtomototransport vositasi ro‘yxatdan o‘tkazilganligi to‘g‘risidagi guvohnomalar ularning berilgan sanasiga muvofiq holda yangisiga almashtiriladi. Xususan, 2010-yilgacha bo‘lgan davrda berilgan “prava” va “texpasport”lar 2023-yil 31-martgacha, 2010—2012-yillarda berilganlari 2023-yil 30-iyungacha, 2013—2015-yillarda berilganlari 2023-yil 30-sentyabrgacha yangisiga almashtirilishi lozim. 2015-yildan keyin berilganlarini esa 2023-yil 31-dekabrga qadar majburiy tartibda almashtirish amalga oshiriladi.
Eski namunadagi milliy haydovchilik guvohnomalari va avtomototransport vositasi ro‘yxatdan o‘tkazilgani to‘g‘risidagi guvohnomalar ularning berilgan sanasiga muvofiq holda yangisiga almashtiriladi. Xususan:
- 2010-yilgacha bo‘lgan davrda berilganlari — 2023-yil 1-apreldan;
- 2010—2012-yillarda berilganlari — 2023-yil 1-iyuldan;
- 2013—2015-yillarda berilganlari — 2023-yil 1-oktabrdan;
- 2015-yildan keyin berilganlari — 2024-yil 1-yanvardan boshlab haqiqiy emas deb hisoblanadi.
Izoh (0)