Xitoy va O‘zbekiston Rossiya yog‘ochining asosiy iste’molchilari bo‘lib, eksportning deyarli to‘rtdan uch qismi ushbu mamlakatlarga to‘g‘ri keladi. Xitoy o‘z ulushini eng ko‘p oshirmoqda, deb yozadi “TASS”.
“2023-yilning birinchi choragi yakunlariga ko‘ra, 4,2 million kub metr kesilgan yog‘och eksport qilindi. Joriy yilning uch oyida eksport qilingan mahsulotlarning 74 foizdan ortig‘i Xitoy va O‘zbekistonga to‘g‘ri keldi. O‘tgan yili ularning ulushi 56 foizni tashkil etgan. Xitoy Rossiyadan yog‘och importini eng ko‘p — 98 ming kub metr yoki 3,5 foizga oshirib, 2,9 million kub metrgacha yetkazdi. Shu tariqa Xitoyga eksport 49 foizdan 64 foizga oshdi”, — deyiladi hisobotda.
Yog‘ochning ikkinchi yirik xaridori — O‘zbekiston. Respublika xaridlar hajmini 13 foizga yoki 57 ming kub metrga oshirib, 479 ming kub metrga yetkazgan. Bozor ulushi ham 11 foizga oshgan. 2023-yilning birinchi choragidagi asosiy kontragentlar qatorida Eron, Tojikiston, Turkiya, BAA va Qirg‘iziston 2022-yilning shu davriga nisbatan xaridlarini sezilarli darajada oshirdi.
2022-yilda Rossiyada yog‘och tayyorlash 2021-yilga nisbatan 13,5 foizga kamaygan edi. Biroq 2023-yilda vaziyat barqarorlashishi kutilmoqda.
Izoh (0)