Qatar va Birlashgan Arab Amirliklari diplomatik munosabatlarni tiklashga kelishib oldi, ikki davlat elchixonalari va konsulxonalari 19-iyun, dushanbadan ish boshlaydi. Bu haqda Qatar Tashqi ishlar vazirligi Twitter’dagi sahifasida ma’lum qildi.
“Ikki davlatning o‘zaro munosabatlarni mustahkamlash bo‘yicha kelishuvi va majburiyatlaridan kelib chiqib, Qatar va BAA 2023-yil 19-iyun, dushanba kuni Qatarning Abu-Dabidagi elchixonasi va Dubaydagi konsulxonasi, shuningdek, Dohadagi BAA elchixonasi qayta ochilishi bilan diplomatik munosabatlar tiklangani haqida eʼlon qiladi”, — deyiladi xabarda.
Vazirlikning taʼkidlashicha, “bu qadam ikki davlat rahbariyatining irodasini aks ettiradi va qardosh xalqlarning orzu-umidlarini ro‘yobga chiqarish yo‘lida qo‘shma faoliyatni kuchaytirishdan iborat bo‘ladi”.
2017-yil iyun oyida BAA Bahrayn, Misr, Liviya va Yaman bilan birgalikda Qatarni mamlakatni beqarorlashtirishda va ekstremistik mafkurani, shuningdek, mintaqada faoliyat yuritayotgan guruhlarni qo‘llab-quvvatlashda ayblab, u bilan diplomatik aloqalarni uzgan edi. Doha bu ayblovlarni asossiz deb atadi.
Eslatib o‘tamiz, Saudiya Arabistoni, Bahrayn, Qatar, Kuvayt, Ummon va BAA tashqi ishlar vazirliklari rahbarlari Suriyani ham Arab davlatlari ligasiga qaytarish bo‘yicha maslahatlashuvlarni boshlagan. Yig‘ilish ishtirokchilari mamlakatni “arablar bag‘riga” qaytishga chaqirgan.
Izoh (0)