“Mehridaryo” loyihasiga farg‘onalik A’zamjon Abdusamatov murojaat qilib, uzoq yildan buyon og‘ir dard bilan kurashayotgan o‘g‘lini operatsiya qildirish uchun xalqdan yordam so‘ramoqda.
— O‘g‘lim Abdulhay Egamberdiyev 1994-yil dunyoga kelgan. Olti yoshda o‘g‘lim bog‘chaning ikkinchi qavatidan boshining orqa qismi bilan yiqilgan. Boshida gemotoma hosil bo‘lgan. Ammo tarbiyachilar bu haqida bizga aytmagan. Gemotoma shishib, kuchli og‘riq bo‘lganidan keyingina yiqilgani haqida xabar topganmiz.
Shifokorlarning aytishicha, orqa miyadagi qon tomir siqilib qolgan va bu nafaqat bolaning nutqiga, balki tayanch harakatlariga ham o‘z ta’sirini ko‘rsatadi. O‘g‘lim ruhiy jihatdan sog‘lom, gapimga tushunadi va javob berishga harakat qiladi. Uning gaplarini boshqalar tushunmasligi mumkin, ammo biz nima xohlayotganini bilamiz.
Hozirda o‘g‘lim o‘zi mustaqil yurolmaydi. Uzoq vaqt ham o‘tirolmaydi. 22 yil davomida o‘g‘limni davolatdik, ammo uni operatsiya qilish kerakligini aytishyapti. Ancha yildan buyon xorijga olib borib operatsiya qildirishni aytishadi. Ammo moddiy imkoniyatim bo‘lmagani uchun qildirolmadik. O‘zbekistonlik shifokorimiz germaniyalik yaxshi mutaxassislar Toshkentga kelishi haqida aytishgandi. Uning tahlil natijalarini unga yuborganimizda, 95 foizga davolash mumkin, dedi.
Hozirda qo‘limda 11 ming AQSH dollari bor. Bizga umumiy hisobda 15 ming AQSH dollari kerak. Davolatish uchun uyimni sotib bo‘lganman, biz tomonlarda uy-joylar ancha arzon. Sotadigan hech narsam qolmagani uchun xalqdan yordam so‘rashga majbur bo‘lyapman. Ayolim oqqon kasalligiga chalinib vafot etdi. Uning o‘limidan keyin uyda qolib, o‘g‘limni parvarishlashga mas’ul bo‘lib qoldim. Yaxshi insonlar, o‘g‘limni davolatish uchun qo‘lingizdan kelgancha yordam beringlar, — deydi bemorning otasi.
Abdulhay Egamberdiyevga xayriya qilishni istasangiz,
4073 4200 8531 4965 Abdulkhay Egamberdiyev
Murojaat uchun telefon: +900-532-94-15 A’zamjon Abdusamatov (otasi)
Izoh (0)