“Mehridaryo” loyihasiga Surxondaryo viloyati, Qiziriq tumanida yashovchi Nargiza Mahmonova murojaat qilib, oqqon kasalligiga chalingan o‘g‘lini davolatish uchun xalqdan yordam so‘ramoqda.

— O‘g‘lim Shahriyor Saropov 2021-yildan buyon oqqon kasalligi bilan kurashib kelmoqda. Surxondaryolik shifokorlar ahvoli og‘ir ekanligini aytishganidan keyin turmush o‘rtog‘im bilan uni Toshkentga olib keldik. Moskvaga yuborilgan tahlil javoblari kelgandan keyin kimyoterapiya muolajalarini boshladik. Belidan muolaja olgandan keyin “Ona qishloqqa qaytaylik, jonim og‘riyapti”, deb yig‘layveradi. O‘n bir yoshdagi bola uchun bu katta dard va og‘riq. Qishloqda chorva mollarimiz bor edi. Ikki yil mobaynida o‘g‘limni davolatish uchun ularning barini sotib bo‘ldik. Endi uyimizni sotuvga qo‘yish haqida o‘ylayapmiz. Uyni sotaman deyman-u, bundan tashqari yana uch farzandim borligini o‘ylab, ikkilanib qolaman. Uyni sotsam ularning ahvoli nima kechadi, ko‘chada qolib ketishadimi, deyman. 
Hech bir insonni farzand bilan sinamasin ekan. Katta o‘g‘lim hali maktabni tamomlamagan. Ammo oilamizdagi qiyinchiliklar sabab, mushtdek bola Toshkentga kelib kunlik ishlarda ishlayapti. Topgan pulini bizga jo‘natadi. Turmush o‘rtog‘im ham Toshkentga kelaman, deydi. Ammo “Qizlarim yolg‘iz qoladi, siz Toshkentga kelmay turing”, deyapman. Juda mushkul vaziyatda qoldik. Mana hozir ham tahlillarni Hindistonga jo‘natishimiz kerak. Qo‘limda pulim bo‘lmagani uchun muolajani ham ortga suryapmiz. 
Yaxshi insonlar farzandimni davolatish uchun qo‘lingizdan kelgancha ko‘mak beringlar. Mening bolam ham sog‘ayib sizdek saxiy inson bo‘lsin, — deydi bemorning onasi Nargiza Mahmonova.

Saropov Shahriyorga xayriya qilish istagida bo‘lsangiz,

9860 0825 5071 4917
Nargiza Mokhmonova (onasi)

Murojaat uchun:338464252