“Nabiramni davolatmasam, nogiron bo‘lib qolishi mumkin” — Quyi chirchiqlik ayol shifokorlar aybi bilan nabirasining qo‘l-oyog‘i ishlamay qolganini aytib, xalqdan yordam so‘ramoqda (foto)

“Mehridaryo” loyihasiga Quyi Chirchiq tumanida yashovchi Zamira Umbetova murojaat qilib, nabirasi Yusufbek Umbetovni davolatish uchun xalqdan moddiy yordam so‘ramoqda.

— Nabiram 2021-yili dunyoga kelgan. Sog‘lom, me’yorida rivojlanayotgan bola edi. Ammo yetti oylik bo‘lganida, tomog‘idagi og‘riq sabab kasalxonaga yotqizdik. Shifokorlarning noto‘g‘ri muolajasi sabab, nabiram komaga tushib qoldi. Miyaga kislorod yetmasligi oqibatida tonusga tushib, qo‘l-oyoqlari ishlamay qolgan. O‘tgan yilning aprel oyidan buyon shu ahvol. O‘shandan buyon ko‘rsatmagan shifokorimiz qolmadi. Sentabrda u ikki yoshga to‘ladi, ammo jismoniy va aqliy rivojlanishda orqada qolgan. Boshini tutolmaydi, qo‘li bilan biror narsani ushlolmaydi, emaklay ham olmaydi.

Rossiyalik shifokorlarga ko‘rsatganimizda “Bolaning suyagi qotmasidan muolaja qilish kerak”, deyishdi. Shu bois kelinim har oyda ikki marta kasalxonaga yotib, muolaja oladi. Bundan tashqari, tinimsiz uqalash muolajalariga olib boradi. O‘g‘lim ishlaydi, ammo uning topgan puli bolani davolatishga yetmayapti. Qiyin ahvolga tushib qoldik. Yaxshi insonlar qo‘lingizdan kelgancha yordam beringlar. Bolam ham sog‘ayib, boshqa bolalar singari o‘ynab kulsin, — deydi Zamira Umbetova.

Umbetov Yusufbekka xayriya qilishni istasangiz

8600  3329 0281 3413 (Umbetova Zamira)

Murojaat uchun telefon: +998 99 602 68 69