“Bolamni davolatishga qurbimiz yetmayapti” — farzandidan ayrilgan xatirchilik onaning yana bir bolasi oqqonga chalingan (video)

“Mehridaryo” loyihasiga Xatirchi tumanida yashovchi Xurshida Ravshanova murojaat qilib, qizini davolatish uchun xalqdan yordam so‘ramoqda.

— Qizim Shahrizoda Shopo‘latova 2018-yildan buyon kasallik bilan kurashmoqda. O‘shanda u endigina birinchi sinfga chiqib, xat-savodini chiqarayotgan edi. Isitmasi tushmay, o‘zini xolsiz sezaverdi. Avvaliga Navoiyda, undan keyin Toshkentda davolatdik. Bir yillik davolanishlardan so‘ng shifokorlar qizimga oqqon tashxisini qo‘yishdi. Kasallik umurtqasi va oyoqlarining harakatlanishiga aks ta’sir etgani uchun aravachaga mixlanib qoldi. Qizimda kasallikning ikkinchi bosqichi ekanligini, agar davolatsak sog‘ayib ketish ehtimoli yuqoriligini aytishyapti. Ammo uni davolatishga imkonim yetmayapti.
Qizimdan katta akasi o‘pkasida bosim bilan tug‘ilgani uchun vafot etgan. Endi yana bir farzandimdan ayrilishni istamayman. Alloh shifo bersa, uning sog‘ayib ketishiga ishonaman. 
To‘rt nafar farzandim bor, turmush o‘rtog‘im Navoiyda kunlik ishlarga chiqadi. Uning topgani ro‘zg‘ordan ortmaydi. Shifokorlar dori-darmonlarni vaqtida olib ichirib, muolajalarni qilish kerakligini aytishyapti. Xalqdan yordam so‘rash hech bir ona uchun oson emas. Majbur bo‘lganimdan yordam so‘rayapman. Qo‘lingizdan kelsa moddiy yordam bering va qizimning haqqiga duo qilinglar yaxshilar, — deydi bemorning onasi Xurshida Ravshanova.

Shopo‘latova Shahrizodaga xayriya qilishni istasangiz,

8600 0609 9991 52 92
Ravshanova Xurshida (onasi)

Murojaat uchun: +99893) 464-52-24