Surxondaryo viloyatining Sariosiyo tumanida mast erkak bolta bilan profilaktika inspektoriga hujum qildi. Bu haqda IIV matbuot xizmati xabar berdi.
Ma’lum qilinishicha, 30-may kuni soat 16:00 da tumandagi “Hamkorlik” mahallasi raisining uyiga shu mahallada yashovchi, muqaddam bir necha marotaba o‘g‘rilik va giyohvand moddalar bilan noqonuniy muomala qilish jinoyatlarini sodir etgani uchun sudlangan, giyohvand shaxs sifatida profilaktik nazoratga olingan A.I. (1976-yilda tug‘ilgan) mast holda bostirib kirib, maishiy muammolarini ro‘kach qilgan holda mahalla raisi va uyda bo‘lgan oila aʼzolari tinchligini buzib, janjal ko‘targan.
Chaqiruvga asosan voqea joyiga yetib kelgan mahalla profilaktika inspektori kapitan G‘ofur Berdiyev tartibbuzar fuqaro voqea joyidan nomaʼlum tomonga qochib ketganiga guvoh bo‘lgan.
Olib borilgan qidiruv tadbirlari natijasida shu kuni soat taxminan 19:00 larda tartibbuzar A.I. o‘z uyiga qaytib kelgani aniqlanib, u bilan profilaktik suhbat o‘tkazish hamda mahalla raisiga nisbatan sodir etgan huquqbuzarlik holatini rasmiylashtirish maqsadida uning xonadoniga borgan inspektor xonadon egasining keskin qarshiligiga uchragan.
Xonadon egasi bolta bilan unga hujum qilib, uning chap qo‘l tirsagini yaralagan. Shunga qaramay, inspektor jismoniy kuch ishlatib, huquqbuzarni zararsizlantirgan.Shundan so‘ng inspektor xonadon qo‘shnilari va voqea joyiga yetib kelgan hamkasblari yordamida shifoxonaga yetkazilgan.
Tibbiy ko‘rik natijasida chap tirsak pastki qismi suyaklarining ochiq singani va qon tomirlari kesilishi oqibatida ko‘p qon yo‘qotgani aniqlanib, tezkorlik bilan tegishli muolajalar ko‘rsatilgan.
Hozirda mazkur holat yuzasidan Sariosiyo tumani prokuraturasi tomonidan tegishli moddalar bilan jinoyat ishi qo‘zg‘atilib, gumonlanuvchi shaxs protsessual tartibda qamoqqa olingan.
Hayotini xavf ostiga qo‘yib jinoyatchini zararsizlantirgan profilaktika inspektorini esa rag‘batlantirish masalasi ko‘rilmoqda.
Izoh (0)