Qoraqalpog‘istonda tadbirkorlik subyektlaridan olinadigan soliqlar 50 foizga kamaytirilishi mumkin

Orolbo‘yi mintaqasini rivojlantirish masalalari va ekologiya qo‘mitasining majlisida Senatning qirq birinchi yalpi majlisi kun tartibi doirasida muhokama qilinadigan qonunlar va boshqa masalalar ko‘rib chiqildi. Bu haqda parlament yuqori palatasi matbuot xizmati xabar berdi.

Qayd etilishicha, qo‘mita a’zolari “O‘zbekiston Respublikasining ayrim qonun hujjatlariga Qoraqalpog‘iston Respublikasida investitsiya va ishbilarmonlik muhitini yaxshilashga qaratilgan qo‘shimchalar kiritish to‘g‘risida”gi qonunga e’tibor qaratgan.

Qonun bilan Soliq kodeksiga Qoraqalpog‘iston Respublikasining tadbirkorlik subyektlari uchun foyda solig‘i, aylanmadan olinadigan soliq, mol-mulk solig‘i va yer solig‘ini 2028-yil 1-yanvarga qadar 50 foizga kamaytirishni nazarda tutuvchi o‘zgartishlar kiritilmoqda. 

Shuningdek, tadbirkorlik faoliyatini amalga oshirayotgan yuridik shaxslar uchun ijtimoiy soliq stavkasi 1 foiz miqdorida belgilanmoqda, yakka tartibdagi tadbirkorlar tomonidan to‘lanadigan ijtimoiy soliq esa shaharlar hududida faoliyatni amalga oshirayotgan shaxslar uchun 12 baravarga, tumanlar hududida faoliyatni amalga oshirayotgan shaxslar uchun 6 baravarga kamaytirilmoqda hamda yiliga bazaviy hisoblash miqdorining bir baravari miqdorida belgilanmoqda.

Bundan tashqari, “Davlat boji to‘g‘risida”gi qonuniga Qoraqalpog‘iston Respublikasi hududidagi nodavlat ta’lim tashkilotlarining o‘quv jarayoniga jalb etiladigan chet el mutaxassislari (o‘qituvchilari) 2027-yil 1-oktabrga qadar konsullik yig‘imini hamda doimiy yashash va vaqtincha turgan joyi bo‘yicha ro‘yxatdan o‘tkazganlik uchun undiriladigan davlat bojini to‘lashdan ozod qilinishini nazarda tutuvchi o‘zgartishlar kiritilmoqda. 

Taqdim etilayotgan imtiyozlar hududning investitsiyaviy jozibadorligini yanada oshirish, tadbirkorlikni rivojlantirish, yangi ish o‘rinlarini va yangi soha va tarmoqlarni yaratish, pirovardida aholi farovonligini ta’minlash, shuningdek, ta’lim jarayonlarini jahon andozalariga mos ravishda olib borish, yangi pedagogik texnologiyalarni milliy ta’lim tizimiga integratsiya qilishda muhim omil bo‘lishi ta’kidlandi. 

Yig‘ilish yakunida ko‘rib chiqilgan masalalar yuzasidan qo‘mitaning tegishli qarorlari qabul qilingan.