2023-yilning 24-may kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Xalq banki faoliyati bo‘yicha “2022-yil sarhisobi, transformatsiya strategiyasi doirasida 2023-yil uchun belgilangan vazifalar” mavzusida matbuot anjumani o‘tkazildi. Tadbirda Xalq bankining 2022-yildagi faoliyati davomida erishilgan natijalar va 2023-yilda bank oldida turgan ustuvor hamda dolzarb vazifalar to‘g‘risida so‘z yuritildi.
Anjumanni Xalq banki boshqaruvi raisining birinchi o‘rinbosari Zafar Azimov kirish so‘zi bilan ochib berib, mavzu yuzasidan yig‘ilganlarga batafsil ma’lumot berdi.
Qayd etilganidek, 2022-yilda Xalq bankini transformatsiya qilish strategiyasi va uni amalga oshirish yuzasidan Osiyo taraqqiyot banki bilan hamkorlikda “Yo‘l xaritasi” ishlab chiqildi va tasdiqlandi. Hozirda bankni transformatsiya qilish bo‘yicha ishlar boshlangan va sezilarli ijobiy natijalarga erishilmoqda.
Bank tomonidan chakana mijozlarni kreditlash maqsadida “kredit konveyeri” ishga tushirildi. Aholiga ipoteka va ta’lim kreditlari ajratilishi bo‘yicha Xalq banki respublika banklari orasida yetakchi bo‘ldi. Xususan, 2022-yilda ta’lim krediti ajratish bo‘yicha butun respublikamizdagi jami ko‘rsatkichlarning 40% aynan Xalq banki tomonidan amalga oshirildi. Natijada moliya muassasasi ta’lim kreditlarini ajratishda respublika banklari orasida birinchi bo‘ldi.
2022-yilda Sberbank kartalaridan Xalq banki kartalariga Rossiyaning barcha hududidan “SberBank Onlayn” mobil ilovasi orqali 24/7 rejimida xalqaro pul o‘tkazmalarini amalga oshirish tizimi yo‘lga qo‘yildi.
Shuni alohida ta’kidlash kerak, bank operatsiyalari, davlat va ijtimoiy xizmatlarni masofadan ko‘rsatish maqsadida bankning yangi mobil ilovasi–“Xazna” va uning veb-dasturi ishga tushirildi. Natijada, mazkur ilova yordamida aholiga ko‘rsatilayotgan 40 dan ortiq davlat va ijtimoiy xizmatlardan foydalanish imkoniyati yaratildi.
Bundan tashqari, Xalq banki aholiga bank kartasidagi mablag‘larini naqdlashtirish, shu bilan birga, bank kartasi bilan bog‘liq boshqa xizmatlarni amalga oshirishda yanada qulaylik yaratish maqsadida hududlarga o‘rnatilgan bankomatlar sonini ko‘paytirdi. Xorijdan 1 800 ta yangi bankomatlar olib kelinib, hududlardagi mahallalarga o‘rnatildi va jami bankomatlar soni 3 111 taga yetkazildi. Natijada, bugungi kunda Xalq banki bankomatlar soni bo‘yicha respublikada birinchi o‘rinda bo‘lib, o‘rnatilgan jami bankomatlarning 30%dan yuqorisi moliya muassasasiga tegishli.
Qolaversa, joriy yilning may oyida Xalq banki birinchilardan bo‘lib HUMO va UzCard bankomatlarini integratsiyalash ishlarini yakuniga yetkazdi. Endilikda moliya muassasiga qarashli bankomatlar qaysi to‘lov tizimiga tegishli bo‘lishidan qat’iy nazar HUMO va UzCard kartalaridan naqd pul yechish imkoni yaratildi.
O‘z-o‘ziga xizmat ko‘rsatuvchi Avtomatlashtirilgan depozit mashinalari (ADM) soni 40 taga oshirilib, umumiy 52 taga yetkazildi.
O‘zbekiston Respublikasi Prezidentining 2022-yil 7-apreldagi 198-son qaroriga asosan, pensiya jamg‘armalarini bank kartalari orqali oluvchi pensionerlarga 1% keshbek to‘lovi tasdiqlandi. Natijada bugungi kunda bank kartasi orqali pensiya mablag‘larini oluvchilar ulushi 32 %dan 63 %ga ko‘paydi.
Bank tomonidan fuqarolarga farzandi tug‘ilganligi haqidagi guvohnomani rasmiylashtirish bilan avtomat tarzda bank kartasi orqali “suyunchi puli”ni olish tizimi joriy etildi. Natijada, 2022-2023-yillarda 252 ming nafar fuqarolarga salkam 119 mlrd so‘mlik to‘lovlar avtomatlashgan holda bank kartasi orqali to‘lab berildi.
Bank tomonidan Oilaviy tadbirkorlik dasturlari bo‘yicha ham qator ishlar amalga oshirilmoqda. Jumladan, dastur doirasida mijozlarni kreditlash yuzasidan joriy etilgan yagona elektron platformasi (oilakredit.uz) orqali 2022-2023-yillarda 226,6 mingta mijozga 4,8 mlrd so‘mlik imtiyozli kreditlar ajratildi.
Xizmat ko‘rsatish jarayonlarini muvofiqlashtirish hamda kassadagi naqd pul mablag‘larini samarali va markazlashgan holda boshqarish maqsadida Xalq banki Toshkent shahrida “Yagona kassa markazi” tashkil etildi.
Bu orqali bankomatlarni o‘z vaqtida naqd pul bilan ta’minlash hamda uzluksiz va barqaror ishlashini ta’minlash, kassa qoldiqlarini to‘g‘ri nazorat qilish, pensiya va nafaqa mablag‘larini pensionerlarga to‘lanishini markazlashgan holda nazorat qilish kabi qulayliklar yaratildi.
Bank va kassa operatsiyalarini markazlashtirish hisobiga mijozlarga tez va sifatli xizmat ko‘rsatish imkoniyatini yaratish maqsadida bank filiallari bosqichma-bosqich “Yagona MFO” tizimiga o‘tkazilmoqda. Bugungi kunda bankning Toshkent shahar, Sirdaryo va Navoiy viloyat filiallari “Yagona MFO” tizimiga o‘tkazildi.
Qolaversa, bankda moliyaviy hisobotlarni Moliyaviy hisobotlarning xalqaro standartlariga (MHXS-9 shakli) muvofiq tayyorlanishi yo‘lga qo‘yildi.
Umumiy qilib aytganda, Xalq banki tizimida mavjud biznes jarayonlar optimallashtirilishi natijasida aholi va mijozlarga ko‘rsatilayotgan xizmatlarni avtomatlashtirish, ko‘lamini kengaytirish hamda sifat darajasini oshirish bo‘yicha qator ishlarni amalga oshirish davom etmoqda.
Reklama huquqi asosida.
Izoh (0)