Qrim yarimoroli ozod qilinganidan keyin u katta ehtimol bilan avtonom maqomdan mahrum bo‘ladi. Bu haqda Ukraina prezident ofisi rahbari maslahatchisi Mixail Podolyak ma’lum qildi.
Uning fikricha, unitar davlat tarkibida avtonomiyaning mavjudligi separatistik kayfiyatlar uchun zamindir.
“Shubhasiz, avtonomiyaga ega bo‘lganingizdan so‘ng, siz ongsiz ravishda o‘zingizni qaysidir ma’noda boshqa mintaqalardan yaxshiroq deb hisoblaysiz. Unitar davlat uchun avtonomiya xavfli yo‘l, bu mintaqaviy darajadagi nizolar yo‘lidir”, — dedi Podolyak.
Zelenskiy ofisi vakili Ukrainada ayni paytda huquqlari hurmat qilinishi kerak bo‘lgan etnik ozchiliklar mavjudligini ta’kidladi. Shu nuqtayi nazardan u Qrim tatarlarini tilga oldi.
Qrimni va umuman butun Ukraina jamiyatini ukrainlashtirish masalasini sharhlar ekan, Podolyak buning uchun, birinchi navbatda, hatto xalqaro miqyosda ham qiziqarli bo‘ladigan yuqori sifatli madaniy mahsulotni yaratish zarur, degan fikrni bildirdi.
Izoh (0)