Warner Bros “Garri Potter” asari bo‘yicha serial suratga olmoqda (video)

Warner Bros va HBO telekanali Joan Roulingning “Garri Potter” kitoblari asosida serial tayyorlaydi, deb xabar bermoqda “Pravila jizni” nashri.

“Biz tomoshabinlarga Xogvartsni qayta kashf qilish imkoniyatini berishdan mamnunmiz. Garri Potter — madaniy hodisa va muxlislar hali ham bu sehrli dunyo bilan bog‘liq bo‘lgan ko‘proq kontentni xohlashi aniq. Biz Warner Bros va Joan Rouling bilan birga har bir ibratli kitobni batafsil ekranga olib chiqadigan serialni ishga tushiramiz”, — deb e’lon qildi HBO telekanali.

Kutilganidek, serialning har bir fasli Garri Potter haqidagi yettita kitobdan biriga asoslanib suratga olinadi. Rouling loyihada ijrochi prodyuserlardan biri bo‘ladi, unga Nil Bler (“Fantastik maxluqlar” loyihasi muallifi) hamrohlik qiladi. Serialda yangi aktyorlar ham ishtirok etadi. Premyeraning taxminiy sanasi hozircha e’lon qilinmagan.

Warner Bros va HBO suratga olinishi rejalashtirilayotgan yangi serial tizerini namoyish qildi. “Xogvartsdan sizga kelgan maktub shu yerda”, — deyiladi uning tavsifida.