O‘zbekiston xalq artisti, aktrisa Zuhra Ashurova egizagi yo‘qligi, nima sababdan unga Zuhra deb ism qo‘yishgani, hujjatda 16-sentabr deb yozilgan bo‘lsa-da, tug’ilgan kunini 31-avgustda nishonlashi haqida gapirib berdi.
“Beshinchi farzand bo‘lganman, otamning ham xafsalasi pir bo‘lgandir”
“Oilada bechinchi farzandman, mening buvim Do‘rmonda doyalik qilgan. Buvim ‘Do‘rmonning 90 foiz bolasini men tug‘dirganman’, — derdi. Onamni to‘lg‘oq tutgan vaqt buvimni chaqirib kelishgan ekan, bolalar uyg‘onib qolmasin deb oshxonada meni dunyoga keltirgan ekan.
Chillam chiqqanidan keyin ham ismim qo‘yilmagan ekan. Bir kuni xolamning katta qizi kelib, onamdan mening ismimni nima qo‘yishganini so‘ragan. Onam hali ham ismim qo‘yilmaganini aytgan. Beshinchi farzand bo‘lganman, otamning ham xafsalasi pir bo‘lgan”, —deb eslaydi Zuhra Ashurova.
“Xolamning qizi onamga: ‘Ko‘nglingga olmasang mening ismimni qo‘y, nomim o‘chib ketmasin’, — deb aytgan. Ular befarzand bo‘lgan. Onam otamga hamma voqeani gapirib bergan. Keyin otam tongga yaqin tug‘ilganimni eslab, Zuhro yulduziga qiyoslab ismimni qo‘yishgan.
Oradan ancha vaqt o‘tib tug‘ilganlik haqida guvohnomamni olgani borishgan. Otamga farzandingizni tug‘ilgani qachon edi, endi tug‘ilganlik haqida guvohnomasini olgani keldingizmi”, — deyishgan.
“Aslida 31-avgustda tug‘ilganman. Otam farzandimni tug‘ilganiga ko‘p bo‘lmadi, 16-sentabrda tug‘ildi’, — deb aytgan. Ismim Zuhra, tug‘ilgan kunim ikkita: 31-avgust va 16-sentabr. Otam aytgan tug‘ilgan kunimni, ya’ni 16-sentabrni 1997-yilgacha nishonlab yurdim.
1998-yilning 15-sentabrida otam tomimizning ustiga yong‘oq qoqaman, deb chiqib yiqilgan, kasalxonaga olib borishgan va o‘sha yerda vafot etgan. Otamni 16-sentabr kuni ko‘mganmiz. 1998-yildan beri tug‘ilgan kunimni 31-avgustda nishonlayman, 16-sentabr men uchun juda ta’sirli kun” , — deydi aktrisa.
Izoh (0)