AQSHning maxfiy harbiy hujjatlarini internetga sizdirgan shaxs harbiy bazada ishlagan 20 yoshli yigitdir. Bu haqda The Washington Post xabar berdi.
Ma’lum qilinishicha, yigit Ukraina mudofaasidagi zaifliklar, shuningdek, mamlakatda faoliyat yuritayotgani aytilayotgan Buyuk Britaniya maxsus kuchlari sonini ochib beruvchi o‘ta maxfiy ma’lumotlarni Discord onlayn o‘yin platformasida yigirmaga yaqin erkak va yoshlar bilan bo‘lishgan.
Guruh a’zolarining ta’kidlashicha, ularning barchasi “qurol va harbiy texnika”ga qiziqadi. Pentagondan ma’lumotlarning sizib chiqishini O.G taxallusli shaxs amalga oshirgan. Guruh a’zolaridan biri gazetaga anonim tarzda hujjatlarni tarmoqqa sizdirgan yigitning jismoniy holati yaxshiligi, u qurollangan va tayyorgarlikdan o‘tganini aytdi. Hujjatlar “deyarli so‘zma-so‘z shifrlangan”. Yigit “harbiy bazadagi ishidan” maxfiy ma’lumotlarni qo‘lga kiritgan.
Hafta boshida Discord o‘ta maxfiy ma’lumotlarning ommaviy sizib chiqishiga oid tergov bilan hamkorlik qilayotganini aytdi. Hujjatlarning e’lon qilinishi AQSH hukumati va undan tashqarida shokka sabab bo‘ldi.
Amerika razvedka idoralari tomonidan tayyorlangani aytilgan maxfiy hujjatlarning oshkor etilishi 7-aprel kuni ommaga ma’lum bo‘ldi. Ular bir necha hafta oldin Internetda paydo bo‘ldi. Gap AQSH razvedka agentliklari uchrashuvlar uchun tayyorlayotgan axborot dayjestlariga o‘xshash hujjatlar haqida ketmoqda.
Ularda G‘arb qurollarining Kiyevga yetkazilishi, jangovar harakatlar borishi, Ukraina va Rossiya harbiy bo‘linmalarining pozisiyalari, o‘q-dori zaxiralari haqidagi ma’lumotlar mavjud.
Izoh (0)