АҚШнинг махфий ҳарбий ҳужжатларини интернетга сиздирган шахс ҳарбий базада ишлаган 20 ёшли йигитдир. Бу ҳақда The Washington Post хабар берди.
Маълум қилинишича, йигит Украина мудофаасидаги заифликлар, шунингдек, мамлакатда фаолият юритаётгани айтилаётган Буюк Британия махсус кучлари сонини очиб берувчи ўта махфий маълумотларни Discord онлайн ўйин платформасида йигирмага яқин эркак ва ёшлар билан бўлишган.
Гуруҳ аъзоларининг таъкидлашича, уларнинг барчаси “қурол ва ҳарбий техника”га қизиқади. Пентагондан маълумотларнинг сизиб чиқишини О.Г тахаллусли шахс амалга оширган. Гуруҳ аъзоларидан бири газетага аноним тарзда ҳужжатларни тармоққа сиздирган йигитнинг жисмоний ҳолати яхшилиги, у қуролланган ва тайёргарликдан ўтганини айтди. Ҳужжатлар “деярли сўзма-сўз шифрланган”. Йигит “ҳарбий базадаги ишидан” махфий маълумотларни қўлга киритган.
Ҳафта бошида Discord ўта махфий маълумотларнинг оммавий сизиб чиқишига оид тергов билан ҳамкорлик қилаётганини айтди. Ҳужжатларнинг эълон қилиниши АҚШ ҳукумати ва ундан ташқарида шокка сабаб бўлди.
Америка разведка идоралари томонидан тайёрлангани айтилган махфий ҳужжатларнинг ошкор этилиши 7 апрель куни оммага маълум бўлди. Улар бир неча ҳафта олдин Интернетда пайдо бўлди. Гап АҚШ разведка агентликлари учрашувлар учун тайёрлаётган ахборот дайжестларига ўхшаш ҳужжатлар ҳақида кетмоқда.
Уларда Ғарб қуролларининг Киевга етказилиши, жанговар ҳаракатлар бориши, Украина ва Россия ҳарбий бўлинмаларининг позисиялари, ўқ-дори захиралари ҳақидаги маълумотлар мавжуд.
Изоҳ (0)