Қорақалпоғистоннинг Хўжайли туманида мактаб ўқувчиларига берилган озиқ-овқат маҳсулотлари орасидан қум ва қизлар тўғноғичи чиқди. Бу ҳақда “Дарё” мухбири хабар берди.
Маълум бўлишича, ҳолат Қорақалпоғистон Республикаси Халқ таълими вазирлиги назоратига олинган.
2023 йил 7 апрель куни Хўжайли туманидаги 41-сонли мактабга 388 ўқувчига (1-4-синф) тасдиқланган меню асосида ёнғоқли кекс, “Стел” шоколади, олма, ширин чой етказиб берилган.
Шу куни 2-б синф ўқувчиларига берилган “Стел” шоколадидан қум чиққан. Бу ҳақда шу синф раҳбари Б.Бекбўсинова мактаб раҳбариятига видеохабар орқали мурожаат қилган. Мактаб раҳбарияти эса озиқ-овқат етказиб берадиган кейтеринг корхонасига хабар берган.
“Мактабга озиқ-овқат маҳсулотлари 2022 йил 10 октябрдан ‘Бекберген сервис орайи’ МЧЖ томонидан етказиб берилади. Ўрганиш ишлари давомида 7 апрель куни эрталабки соат 09:45 да олиб келинган озиқ-овқат маҳсулотларини махсус комиссия аъзолари Р.Эрежепова, А.Абдисаметова, Д.Ниёзова, Н.Авезова ва Қ.Аметовалар қабул қилиб олган. Видеодаги ювилмаган олма бўйича ҳолат эса жорий йилнинг 7 февраль куни олиб келинган маҳсулот экани, бу бўйича кейтеринг корхонасига ва комиссия аъзоларига огоҳлантириш берилгани маълум қилинди”, — дейилади вазирлик хабарида.
Қўшимча қилинишича, вазирлик камчиликларни бартараф қилиш бўйича тегишли тартибда чоралар ишлаб чиққан ва ўрганиш ишлари амалга оширилишини, натижаси ҳақида маълумот берилишини маълум қилган.
Мазкур ҳолат юзасидан “Дарё” мухбири қўшимча суриштирув олиб бормоқда.
Изоҳ (0)