La Liga. “Barselona” Kataloniya derbisida ochko yo‘qotdi

Futbol bo‘yicha Ispaniya chempionatining 28-turida “Barselona” 10-aprel, dushanba kuni “Jirona”ga qarshi bahs olib bordi.

Uchrashuvda maydon egalari ustunlikka ega bo‘ldi, biroq raqib darvozasiga yo‘l topa olmadi. O‘yin nursiz durang bilan yakun topdi.

Katalonlar liga mavsumidagi 21 ta o‘yinda o‘z darvozasi daxlsizligini saqlab qoldi. Bu borada klub rekordi 1986/87-yilgi mavsumda o‘rnatilgan — 24 ta quruq o‘yin.

“Ko‘k-anorranglilar” ochkolarini 72 taga yetkazib olgan holda ta’qibchi “Real”dan 13 ochkoga ilgarilab ketdi.

28-turdan keyin musobaqa jadvali quyidagi ko‘rinishni oldi:

La Liga

28-tur bahsi

10-aprel, dushanba

“Barselona” – “Jirona” 0:0

“Barselona”: ter Shtegen, Kunde, Arauxo, Erik Garsiya, Balde, Serxi Roberto (Kessie, 46), Buskets, Gavi, Rafinya (Alba, 75), Fati (Ferran Torres, 68), Levandovski.

“Jirona”: Gassaniga, Martines, David Lopes, Bueno, Xavi, Sigankov (Rikelme, 71), Toni Vilya (Yan Kouto, 60), Romeu, Garsiya (Aleish Garsiya, 46), Martin (Fernandes, 85), Kastelyanos (Stuani, 60).

Ogohlantirishlar: Kastelyanos (32), Stuani (77).