“Ҳолат юзасидан кўрсатма беришдан бош тортди”. Тошкент шаҳар судлари Activist блогери ҳақида

Activist номи билан танилган блогер Ҳожиакбар Носиров 5 апрель куни йогуртлар ҳаром экани тўғрисидаги видеони ижтимоий тармоққа жойлаштиргани ортидан 15 суткага қамалгани ҳақида хабар берилган эди. Тошкент шаҳар судлари блогер иши бўйича қўшимча маълумот берди. 

Унга кўра, 8 апрель куни жиноят ишлари бўйича Шайхонтоҳур туман судида Маъмурий жавобгарлик тўғрисидаги кодекснинг 184-3-моддаси (миллий, ирқий, этник ёки диний адоватни тарғиб қилувчи материалларни тайёрлаш, сақлаш ёки тарқатиш) ва 194-моддаси (ички ишлар органлари ходимининг қонуний талабларини бажармаслик) 1-қисми бўйича унга нисбатан юритилган маъмурий иш кўриб чиқилди.

Шайхонтоҳур тумани Ички ишлар органлари фаолиятини мувофиқлаштириш бўлими ТҚКБ ходимлари томонидан Тошкент шаҳрида диний муҳитни соғломлаштириш борасида олиб борилаётган ижтимоий тармоқларда мониторинг тадбирлари давомида, у ўзига тегишли бўлган Activist канали орқали ҳар хил турдаги диний мазмундаги видеоларни, яъни Дин ишлари бўйича қўмитанинг 2023 йил 7 апрелдаги хулосасига асосан аҳоли орасида турли ихтилоф ва тушунмовчиликлар келтириб чиқариши мумкин бўлган ғояларни тарқатгани аниқланган.

Бундан ташқари, иш ҳужжатларига кўра, блогер ИИО ходимларининг ҳужжатларини текшириш учун тақдим этиш, тушунтириш бериш ва иш ҳужжатлари билан танишиб чиқиш каби қонуний талабларга бўйсунмаган. Суд мажлисида ҳуқуқбузар тариқасида сўроқ қилиш учун унга сўз берилганида ҳуқуқбузар ва унинг ҳимоячиси ҳолат юзасидан кўрсатма беришдан бош тортди.

У кўрсатма беришдан бош тортган бўлса-да, унинг юқоридаги ҳуқуқбузарликларни содир этгани иш ҳужжатларидаги ИИО ФМБ ходимининг билдиргиси, далолатнома, кўздан кечириш ва электрон материалларни олиш баённомаси, Activist каналидан олинган фотолавҳалар, DVD-R дискидаги видеолавҳалар, ашёвий далилларни олиш баённомаси, ҳамда Дин ишлари бўйича қўмитанинг экспертлик хулосаси ва бошқа далиллар билан ўз тасдиғини топди.

Суднинг қарори билан Х.Н. Маъмурий жавобгарлик тўғрисидаги кодекснинг 184-3-моддаси ва 194-моддаси 1-қисмида тутилган ҳуқуқбузарликни содир этганликда айбли деб топилиб, унга 15 сутка маъмурий қамоқ жазоси тайинланди.

Қайд этилишича, ушбу қарор устидан қонунчиликда белгиланган тартиб ва муддатларда Тошкент шаҳар судига апелляция шикояти ёки протест берилиши мумкин.