“Barselona” Messini qiyinchiliksiz ortga qaytarishi mumkin. Arablar shartnomani moliyalashtirishga tayyor

“Barselona” Lionel Messini ortga qaytarish fikridan qaytmayapti.

Argentinalik futbolchining “PSJ” bilan amaldagi shartnomasi joriy mavsum oxirida yakunlanadi. Messi Parij klubi bilan yangi bitim borasida kelisha olgani yo‘q.

“Barselona” Leoni ortga qaytarish niyatida, biroq klubdagi moliyaviy muammolar bunga yo‘l qo‘ymasligi mumkin. Ammo katalonlar bu muammoni aylanib o‘tish yo‘lini ham topib qo‘ydi.

OAVda qayd etilishicha, arab mamlakatlaridan bo‘lgan yirik homiy Messining “Barselona”ga qaytishini moliyalashtirishga tayyorligini bildirgan. Agar homiy bilan kelishuvga erishiladigan bo‘lsa, Messi sarflanishini kerak bo‘lgan pullar moliyaviy feyr-pley shartlarini bajarishga yo‘naltiriladi.

Bu taklif klub uchun ideal variant bo‘lib turibdi. Agar pul homiydan keladigan bo‘lsa, bu klubning maoshlar fondini ham sezilarli kamaytirishga yordam beradi va “Barselona” boshqa yangi shartnoma tuzish imkoniyatini qo‘lga kiritadi.

Jurnalist Gilyem Balagening xabar qilishicha, “Barselona” ustozi Xavi doimiy ravishda Messi bilan muloqotda bo‘lib turibdi. Mutaxassis sobiq jamoadoshi katalonlar safiga qaytadigan bo‘lsa, uni markaziy yarim himoyada o‘ynatmoqchi. Xuddi Argentina terma jamoasida bo‘lgani kabi Messi hujum va tayanch yarim himoyachilari o‘rtasida bog‘lovchi vazifasini o‘taydi.